Qasym-Jomart Toqaev Qatar Ámiri Támım ben Hamad Ál Tánıge shaqyrýyn qabyl alyp, Qazaqstanǵa memlekettik saparmen kelgeni úshin alǵys aıtty.
«Joǵary mártebeli sheıh Támım myrza, ózińizben Qazaqstanda kezdesip otyrǵanyma óte qýanyshtymyn. Meniń shaqyrýymdy qabyl alyp, memlekettik saparmen Qazaqstanǵa kelgenińiz úshin shyn júrekten rızashylyǵymdy bildirgim keledi. Biz búgin ekijaqty qarym-qatynastyń eń mańyzdy máseleleri boıynsha tıisti ýaǵdalastyqtarǵa qol jetkizemiz. Biz úshin Qatar Memleketi – Taıaý Shyǵystaǵy eń mańyzdy seriktes. Sondyqtan qarym-qatynasymyzdy odan ári damytý úshin bar kúsh-jigerimizdi salamyz», dedi Memleket basshysy.
Qatar Ámiri Prezıdent Qasym-Jomart Toqaevqa Qazaqstanǵa shaqyrǵany úshin alǵys aıtyp, qonaqjaılyq kórsetkeni úshin rızashylyǵyn bildirdi.
«Joǵary mártebeli Prezıdent myrza, elińizge memlekettik saparmen shaqyrǵanyńyz úshin alǵys aıtamyn. Eki el arasynda jaqsy qarym-qatynas ornaǵan. Keıingi jyldary ártúrli saladaǵy baılanystarymyz qarqyndy damyp keledi. Búgingi memlekettik sapar aıasynda maýsym aıynda Dohada ótken ekonomıkalyq forým kezindegi birqatar ýaǵdalastyqtardy búgin talqylaımyz. Bul kelisimderdiń maqsaty – birneshe salada yntymaqtastyqty damytý. Búgin biz keńeıtilgen quramda mınısterlerdiń qatysýymen osy máselelerdi jan-jaqty qarastyramyz. Sondaı-aq erteń ótetin Azııadaǵy ózara is-qımyl jáne senim sharalary jónindegi keńes sammıtiniń sátti ótýine tilektestik bildiremin», dedi Qatar Ámiri.
