Resmı derek kózderine súıene otyryp, Qazaqstannyń Mysyrdaǵy elshisi Qaırat Lama Sharıf jańadan taǵaıyndalǵan Mysyr Arab Respýblıkasynyń Mádenıet mınıstri Nevın ál-Kılanımen alǵashqy resmı kezdesýin ótkizdi.
Mysyrdyń Mádenıet mınıstri eki el arasyndaǵy mádenı yntymaqtastyqtyń ilgeri tartqanyna kóńili tolatynyn bildirip, osy baǵyttaǵy yntymaqtastyqty odan ári keńeıtýdi qoldady.
Sonymen qatar kezdesýde suhbattasýshylar Qazaqstan men Mysyrdyń baı tarıhı-mádenı murasy bar ekenin ataı otyryp, muraǵat isi salasyndaǵy normatıvtik quqyqtyq aktiler, aqparat jáne qujattar, muraǵattaný, arheografııa jáne qujattaný boıynsha ádebıettermen, sondaı-aq ózara muraǵattyq qujattardyń jarııalanymdarymen almasýǵa kelisti.
Bul baǵytta Ulttyq muraǵat qorlaryn Qazaqstan men Mysyr halyqtarynyń tarıhy men mádenıeti týraly málimetterdi qamtıtyn qujattarmen tolyqtyrý maqsatynda eki el memleketteriniń ulttyq zańnamasyna sáıkes olardyń kóshirmelerin bir-birine sáıkestendirýge jáne berýge ýaǵdalasty.
Elshi Qaırat Lama Sharıf óz kezeginde Mysyrda qazaqstandyq restavratorlar men basqa da mamandardyń biliktiligin arttyrý kýrstaryn uıymdastyrý týraly usynystar engizdi.
Taraptar 2023 jyly Deshti Qypshaq dalasynyń ataqty perzenti orta ǵasyrda Mysyr men Sham elin dańqty bılegen Sultan az-Zahır Beıbarystyń 800 jyldyǵyn atap ótý mańyzdylyǵyn atap ótti.
Osyǵan oraı Qazaqstan elshisi Mysyr Mádenıet mınıstrine QR Mádenıet jáne sport mınıstrligi ázirlegen usynystaryn tabys etti. Naqty atqarylatyn tirlikterdiń tizbesi tómendegideı.
Mysyrda qandaı is-sharalar ótkizý kózdelinip otyr?
Sonymen birinshi kezekte Kaır qalasynda kúrdeli jóndeýden ótken Sultan az-Zahır Beıbarys meshitin saltanatty túrde ashý josparlanǵan. Ál-Azhar ýnıversıtetinde Mysyr men Sham eliniń Bıleýshisi Sultan Beıbarystyń 800 jyldyǵyna arnalǵan Halyqaralyq ǵylymı-praktıkalyq konferensııasy ótkizilmek.
HHH Kaır halyqaralyq qazirgi zamanǵy eksperımentaldy teatr festıvali sheńberinde Raqymjan Otarbaevtyń «Sultan Beıbarys» spektakli sahnada kórsetiledi.
Mysyr tarıhynyń Mámlúkter dáýirine arnalǵan arab jáne qazaq tilderinde ensıklopedııany jaryqqa shyǵarý josparlanyp otyr.
Mysyrda Sultan Beıbarystyń 800 jyldyq mereıtoıyna arnalǵan merekelik poshta markalary shyǵarylady.
Qazaqstannyń josparlary qandaı?
Astana qalasynda Mysyr men Sham elinde Mámlúkter memleketiniń negizin qalaǵan Deshti qypshaq dalasynyń uly perzenti Sultan Beıbarystyń 800 jyldyq mereıtoıyna arnalǵan halyqaralyq ǵylymı-praktıkalyq konferensııasy ótkiziledi.
Qazaqstan qalalary men eldi mekenderdiń kósheleri men alańdarǵa, sport saraılaryna Sultan Beıbarys esimin berý qarastyrylady.
Qazaqstanda da Sultan Beıbarystyń 800 jyldyq mereıtoıyna arnalǵan merekelik poshta markalary shyǵarylady.
Astana, Almaty, Atyraý, Mańǵystaý, Jambyl, Túrkistan qalalarynda Mámlúkter dáýiri týraly syr shertetin Kaırdiń Islam óneri mýzeıiniń jyljymaly kórmesi uıymdastyrylady.
Mysyr tarapy Qazaqstan Respýblıkasynyń Ulttyq mýzeıine Mámlúkter memleketi dáýirindegi jádigerlerdiń kóshirmelerin jasap, syıǵa tartady.
Barlyq joǵarǵy oqý oryndarynda Sultan Beıbarystyń 800 jyldyǵyna arnalǵan ǵylymı konferensııalar men sımpozıýmdar ótkizý, bul sharalarǵa mysyrlyq jáne arab mámlúktanýshy-ǵalymdardy shaqyra otyryp, Sultan Beıbarystyń tulǵasyn ulyqtaý.
Atyraý oblysy ákimdigimen birlesip, H.Dosmuhamedov atyndaǵy Atyraý ýnıversıtetinde Qypshaq mámlúkterin zertteý Ortalyǵy men murajaı ashý, Mańǵystaý oblysy ákimdigimen birlesip, Aqtaý qalasynda Sultan ál-Mansýr Qalaýyn kompleksi úlgisinde meshit salý máselesin zertteý qolǵa alynady.
Kári Kaspıı jaǵalaýynda «Sultan Beıbarys – Uly Dala eliniń Barysy» atty teatrlyq qoıylymy uıymdastyrylady.
Jambyl oblysy ákimdigimen birlesip, M.H. Dýlatı atyndaǵy Taraz óńirlik ýnıversıtetinde «Atlah-Talas shaıqasynan Aın Jalut shaıqasyna deıingi kezeń» atty Ortalyq Azııa jáne arab tarıhshylarynyń ǵylymı sımpozıýmy ótedi.
2023 jyldyń shilde aıynyń birinshi jeksenbisinde, ıaǵnı Dombyra kúninde «Segiz ǵasyr jyrlaıdy» atty mádenı sharalar ótkizip, jyrshylar men mysyrlyq aýyz ádebıeti maıtalmandarynyń dańqty Sultan Beıbarys pen basqa mámlúkter týraly «Batyrlar jyry» folklor keshterin ótkizý.
Sultan Beıbarystyń 800 jyldyǵy sheńberinde kókpar, báıge, jamby atý, qazaqsha kúres, qusbegilik, asyq, aýdaryspaq jáne taǵy basqa kóshpendilerdiń ulttyq oıyndarynyń halyqaralyq týrnırleri ótedi.
Túrkistan oblysy ákimdigimen birlesip, Halyqaralyq túrki mádenıeti uıymynyń (TIýRKSOI) qoldaýymen, Túrkistan qalasyndaǵy tarıhı-mádenı alańda «Sultan Beıbarystyń Uly Dalaǵa oralýy» atty art-festıval uıymdastyrylady.
О́z kezeginde Mysyr Mádenıet mınıstri Nevın ál-Kılanı qazaq tarapynyń usynys-pikirlerin qarastyrýǵa jáne 23-25 qarashada Astana qalasynda ótetin Saýda-ekonomıkalyq, mádenı-gýmanıtarlyq jáne ǵylymı-tehnıkalyq yntymaqtastyq boıynsha Qazaqstan-Mysyr Úkimetaralyq komıssııasynyń 6-shy otyrysynda birlesken sheshim qabyldaýdy usyndy.
Barshaǵa málim, 2022 jylǵy 13 qyrkúıekte Aqordada Prezıdent Qasym-Jomart Toqaev «ál-Azhardyń» Bas ımamy Ahmed at-Taıebti qabyldady. Kezdesý barysynda Memleket basshysy kelesi jyly Sultan Beıbarystyń týǵanyna 800 jyl tolatyndyǵyn atap ótip, mereıtoıǵa daıyndyq aıasynda Qazaqstan tarapy Kaırdegi Sultan Beıbarys meshitin qaıta jóndeýge aıtarlyqtaı úlesin qosatynyn aıtty.
