Baıanaýylda jyldyń tórt mezgilinde de jumys isteıtin demalys úıleriniń joqtyǵy týraly másele jıi kóteriledi. Jazǵy sýǵa túsý kezeńinde ǵana aqsha tabýdy qup kóretin jergilikti qaltaly kásipkerler buǵan bas aýyrta qoımaıtynyn da baıqaıtyn edik. Ári munda aǵzany saýyqtyrýmen aınalysatyn ortalyqtar da joqtyń qasy. Týrıster kórikti mekenniń sulý tabıǵatyn tamashalap, shıpaly aýasyn jutyp qana qaıtady. Al qysta bul aýmaqqa baratyndar neken-saıaq. Sebebi kelýshilerdiń kózin aýlap, densaýlyǵyn nyǵaıtýǵa shaqyratyn mekemeler qyzmet kórsetpeıdi. Osyǵan oraı, Baıan jerindegi týrızm de alǵashqy aıazben «qatyp» qalatyny shyn.
Bul olqylyqtyń ornyn toltyrýǵa «Tulpar-2021» JShS qulshynyp otyr. Kásiporyn dırektory Arslan Omarovtyń sózine súıensek, Sabyndykól jaǵasynda jyl boıy isteıtin demalys orny salyna bastaǵan. Jobada aǵzany saýyqtyrý kesheni de qarastyrylǵan. «Sabyndykól Plaza» dep atalatyn bolashaq demalys aımaǵynda kelýshiler úshin barlyq jaǵdaı jasalady dep kútilýde.
– Qujat máseleleri sheshilgen soń aýmaqty tolyq qorshadyq. Kelesi jyly qonaqúı men saýyqtyrý keshenin sala bastaımyz. Munda voleıbol, fýtbol, balalar alańdary bolady. Tennıs pen bılıard alańyn da ashpaqpyz. Jazǵy dámhana, odan bólek, mangal múıisi jumys isteıdi. Qurylys aıaqtalǵanda demalys ornynda 50 bólmesi bar qonaqúı, 15 jeke demalys úıi qyzmet kórsetedi. Barlyǵy 250 adamdy jatar orynmen qamtýǵa múmkindik bar, – deıdi ol.
Saýyqtyrý kesheni qasıetti ólkege adamdardy kóptep tartý úshin salynbaq. Buǵy múıiziniń qanymen emdeý júrgiziletin panta vannalaryn quryp, Pavlodardaǵy Moıyldydan shıpaly balshyqty aldyrý josparlanýda. Osylaısha, Baıanaýyldyń týrızm salasy tek jazǵy mezgilde qyzmet kórsetedi degen túsinik joıylmaq. Demalýshylardy jyl boıy qabyldaý bıznes úshin de tıimdi.
Kólge sarqyndy sýlardy jibermeý úshin demalys aımaǵynda káriz júıesin salý da jobalanǵan. Onyń qurylysy barysynda Ile Alataýy ulttyq parkindegi tehnologııalar qoldanylmaq. Iаǵnı qaldyq sýlar qaıta óńdelip, sýarýǵa jiberiledi. Al demalys úıleri men saýyqtyrý keshenin jylytýǵa gaz paıdalanylmaq. Osylaısha, kásipker ekologııalyq turǵydan taza demalys ornyn qurýǵa árekettenýde.
Atap óterligi, «Sabyndykól Plazada» jergilikti jerden shamamen 40-50 adam jumys tabady dep boljanyp otyr. Qurylys jumystary 2024 jyly tolyq tapsyrylady. Demalys orny daıyn bolǵanda jylyna kemi 4-5 myń adamdy qabyldaı alady.
Taǵy bir erekshe nysan atalǵan aýdanǵa qarasty Toraıǵyr kóliniń mańynda turǵyzylýda. «Jasyryn úı» dep atalatyn demalys orny kózge túspeıtin tabıǵat tasasynda ári qolaıly jerde ornalasqan. Aýdandyq dene shynyqtyrý, sport jáne týrızm bóliminiń basshysy Zeınolla Tálipovtiń aıtýynsha, «Soltanov» jeke kásipkerligi byltyr Toraıǵyr aýyldyq okrýginde ornalasqan bir qabatty, aýmaǵy 140 sharshy metr turǵyn úıdi satyp alǵan. Kásipker árqaısysy segiz oryndy eki modýldi úı salyp, 35 tósektik orynnan turatyn korpýsty qaıta jańǵyrtýda. Investısııa kólemi 100 mln teńgeni qurady. Kásip ıesi Ermek Soltanov buǵan qosa kól jaǵasynda eki qabatty qonaqúı men eki kempıng turǵyzyp jatqanyn da jetkizdi.
– Bul aýmaqta buryn eshbir qurylys bolmaǵan. Qazir aýyz sý men elektr júıesi tartylyp, jol tóseldi. Barlyǵyn óz qarajatymyzǵa jasap jatyrmyz. Birinshi qabattaǵy árbir bólmede sanıtarlyq torap – dárethana men jýynatyn oryn bar. Bizdiń demalys ornynda jyl boıy jatyp tynyǵýǵa bolady. Qazir ishki jumystar – kafel men lamınat tóseý, esik ornatý ǵana qaldy. Jańa jylǵa deıin jumysymyzdy bastap ketýge nıettenip otyrmyz. Al kelesi jyly arnaıy ruqsat alsaq, qoǵamdyq tamaqtaný orny men sport alańdaryn salý josparymyzda tur. Ata-analar alańsyz demalý úshin balalaryn qaldyryp kete alatyn bólmeler ashqymyz keledi. Árıne, ol jerde jetkinshekterdi arnaıy qyzmetkerler qaraıtyn bolady, – deıdi kásipker.
Buǵan deıin oblys basshysy Ábilqaıyr Sqaqov atalǵan bolashaq demalys oryndarynyń qurylys barysymen tanysyp qaıtqan edi. Baıanaýyldyń týrıstik áleýetin arttyratyn jobalardy joǵary baǵalady. Ákimniń tapsyrmasymen Jasybaı demalys aımaǵyndaǵy Qońyr áýlıe úńgirine bıik jol salyndy.
Aýdandyq ákimdiktiń deregine súıensek, Baıanaýyl ulttyq parkinde ótken maýsymda shamamen 96 myń adam demalyp qaıtqan. Al Pavlodar oblysy kásipkerlik jáne ındýstrııalyq-ınnovasııalyq basqarmasynyń basshysy Ernur Jáýtikbaevtyń málimetinshe, aımaqtaǵy týrıstik salany damytýǵa 2020-2022 jyldary jalpy somasy 3,1 mlrd teńge ınvestısııa salynǵan. Onyń 1,9 mlrd teńgesi – jeke salymdar. О́ńirdiń týrıstik sektorynda 119 jeke kásipkerlik qyzmet kórsetedi.
Pavlodar oblysy,
Baıanaýyl aýdany
