Foto: Ashyq derekkóz
Joba Almaty oblysyndaǵy «Alataý» arnaıy ekonomıkalyq aımaǵynda iske asady. Osyǵan baılanysty Premer-mınıstr Oljas Bektenov Densaýlyq saqtaý mınıstrligi men «Steppe pharmaceuticals» JShS arasyndaǵy ınvestısııalyq kelisimdi bekitetin qaýlyǵa qol qoıdy.
Jańa keshen tolyq sıkldi farmasevtıkalyq óndiris retinde jumys istemek. Kásiporynda 20 túrli dárilik preparat shyǵarý josparlanǵan. Onyń ishinde onkologııalyq jáne sırek kezdesetin aýrýlardy emdeýge arnalǵan dáriler, sondaı-aq zamanaýı ımmýnobıologııalyq preparattar bar.
2027 jyldan bastap el turǵyndary ózderine qajetti dári-dármekti tegin alady
Jobany iske qosý 2031 jylǵa josparlanǵan. Al óndiris tolyq qýatyna 2032 jyly shyǵady dep kútiledi. Negizgi baǵyttar boıynsha tolyq óndiristik sıklge kóshý 2034 jylǵa deıin kezeń-kezeńimen júzege asady.
Keshen tek dári óndirýmen shektelmeıdi. Munda ǵylymı-zertteý jáne tájirıbelik-konstrýktorlyq jumystar da júrgiziledi. Atap aıtqanda, bıoekvıvalenttilik zertteýleri uıymdastyrylyp, halyqaralyq GMP standarttary engiziledi. Sonymen qatar qazaqstandyq mamandardy daıarlaý jáne olardyń biliktiligin arttyrý júıesi qurylady.
Joba nátıjesinde shamamen 60 jańa jumys orny ashylady. Úkimet bul bastama eldiń dárilik qaýipsizdigin kúsheıtip, ımportqa táýeldilikti azaıtýǵa múmkindik beredi dep otyr.
Otandyq ǵalymdar jýsanǵa allergııany bir aptada emdeıtin dárini ázirledi
Qazir Qazaqstanda farmasevtıka salasynda segiz iri ınvestısııalyq joba júzege asyrylyp jatyr. О́tken jyldyń qorytyndysy boıynsha otandyq farmasevtıkalyq ónim óndirisi 191,1 mlrd teńgege jetip, bir jylda 8,7 paıyzǵa ósken. Al salaǵa tartylǵan ınvestısııa kólemi 390 mlrd teńgeden asty.
