Sýretti túsirgen Erlan OMAR, «EQ»
Kóksý aýdandyq bilim bóliminiń muryndyq bolýymen bıylǵy oqý jylynda ıgilikti ister josparlanyp, birqatar shara ótkizilgen. «Balalar álemi» jobasy aıasynda 3-10 synyp oqýshylarynyń arasynda «Balalar oqýlary» baıqaýy, aıtýly dataǵa tuspa-tus kelgen tulǵalardyń mereıtoılaryna baılanysty esse báıgeleri, «Aqberen» saıystary uıymdastyrylǵan. Aýdan mektepteriniń aýlalyq klýbtary arasynda kishi fýtboldan jarys ótken.
Aýdan ákimi Marlen Kólbaevtyń bastamasymen aýdan kóleminde, ár aýyldyq okrýgte ashyq aspan astynda oqýshylarǵa mýltfılmder men qazaqy qundylyqqa negizdelgen alýan túrli kıno kórsetilgen. Sonymen qatar «Úzdik oqýshylar» klýby qurylǵan. Bul klýbtyń maqsaty – ár pánnen, ár saladan ozyq shyqqan oqýshylardyń nátıjesin nasıhattaý jáne is-sharaǵa tartý.
«Ár aptanyń sársenbi-juma kúnderi saǵat 15:00-de aýdandyq Mádenıet úıinde balalarǵa arnalǵan mýltfılmder men kınofılmder kórsetiledi. Kórsetilim tegin uıymdastyrylady. Munyń barlyǵy – balalarymyzdyń bos ýaqytyn paıdaly ári kóńildi ótkizýge arnalǵan is-sharalar. Mádenıet úıi balalardy asyǵa kútedi, arasynda vıktorınalyq oıyndar oınatylyp, syılyqtar da taratylady. Sondyqtan balalaryńyzdy alyp kelińizder, bir qýanyp, demalyp qalsyn», deıdi M.Kólbaev.
Bilim saıysy, sporttyq jáne mádenı is-sharalardyń basym baǵyty Balalar jylyna oraı josparlanyp, el Prezıdenti mindettegen tapsyrma aıasynda júzege asyrylyp keledi. Bala quqyǵyn qorǵaý, jan-jaqty damytýǵa baǵyttalǵan jobalar men sharalardyń kóptigi kóńil qýantady. Aldaǵy ýaqytta da balalardyń qyzyǵýshylyǵyn arttyratyn, shyǵarmashylyqqa baýlıtyn túrli chellendjder men jobalar josparlanyp otyr.
Jetisý oblysy
