Qara shańyraq ulttyq orkestrdiń maýsymashar konsertinde óner ujymymen birge «Avantı» tenorlar trıosy, Ásel Raqymjan, Arýjan Tólepbergen, Ázıza Ábdireıim, Madına Erlanova syndy jeke oryndaýshylar án aıtyp, jańalyqqa toly jańa maýsymnyń alǵashqy keshin bastady.
Aıta keteıik, Qazaqstannyń aspaptyq mýzykalyq óner tarıhyndaǵy tuńǵysh orkestrdiń jańa maýsymdaǵy jańalyǵy kóp. Sonyń ishinde aýqymdy josparlarǵa toqtalsaq, Qalı Jantileýovtiń 120 jyldyǵy, Qurmanǵazy orkestrin álemge áıgili etken kásibı dırıjer Shamǵon Qajyǵalıevtiń 95 jyldyq mereıtoıy, Respýblıkalyq «Shertpe kúı» festıvaliniń uıymdastyrylýy bolmaq.
Qurmanǵazy atyndaǵy Qazaq ulttyq halyq aspaptar orkestriniń dırektory Medet Qýanyshev kezekti maýsymnyń shyǵarmashylyq tynysyna toqtaldy. «Ulttyq orkestr bolǵandyqtan ár jyl saıyn jańa maýsymdy erekshe daıyndyqpen bastaımyz. Maýsymashar konsert biz úshin úlken mereke desek te bolady. Jańa josparlar, jańa lep, jańa tolqynmen orkestrdi taǵy bir bıikke kóterý úshin qadam basamyz. Sondaı-aq maýsymnyń ashylýyna Mádenıet jáne sport vıse-mınıstri Nurǵısa Dáýeshov bastaǵan bir top óner qaıratkerleri keldi. Maýsymashar konsertimizge kelip, qoldaý kórsetken barsha qonaqtarymyzǵa erekshe alǵysymdy bildiremin. Aıta ketetini, biz óz kórermenderimiz ben ónersúıer qaýymdy qýantý úshin jańa shyǵarmalardy dúnıege ákelýden talmaımyz», dedi.
Al atalǵan óner ujymynyń bas dırıjeri Abylaı Tilepbergen aldaǵy festıvaldiń respýblıkalyq mańyzyn atap ótti. «Jańa maýsym iri jańalyqtarǵa toly bolady dep úlken senimdilikpen aıta alamyn. Jańa maýsymnyń basty oqıǵalary – Qurmanǵazy orkestrine eleýli eńbegi sińgen tulǵalardyń mereıtoılarymen qatar «Shertpe kúı» respýblıkalyq festıvali bolady. Festıval-konkýrs arqyly qazaq jeriniń túkpir-túkpirindegi úlkendi-kishili eldi-mekenderdegi shyn talanttardy báıgege qosyp, úzdigin anyqtaımyz degen oıdamyn. Maýsymnyń ashylýy tek orkestrdiń ǵana emes, orkestr kórermenderiniń de úlken qýanyshy dep bilemin», dedi bas dırıjer.
