Sazdy keshte Dj. Rossınıdiń «Vılgelm Tel» operasyna ývertıýra, S.Taneevtiń orkestrmen klarnetke arnalǵan «Kansona», F.Dopplerdiń orkestrmen fleıtaǵa arnalǵan «Vengerskaıa pastoralnaıa fantazııa», G.Venıavskııdiń Sharl Gýnonyń orkestrmen skrıpkaǵa arnalǵan «Faýst» operasyndaǵy taqyryptarǵa fantazııasy jáne A.Dvorjaktyń «Iz Novogo Sveta» №9 sımfonııasy oryndaldy. Al sahnada sımfonııalyq orkestrdiń jeke oryndaýshylary – halyqaralyq jáne respýblıkalyq baıqaýlardyń laýreattary Dáýlet Seıdahmetov (klarnet), Gúlnaz Joldanova (fleıta), Maııa Medetbek (skrıpka) óner kórsetti. Dırıjerlik pýltte – bas dırıjer Ernar Nurtazın. Sımfonııalyq orkestrdiń kórkemdik jetekshisi – halyqaralyq jáne respýblıkalyq baıqaýlardyń laýreaty Berik Batyrhanov.
Konsertte oryndalǵan «Vılgelm Tell» operasynyń ývertıýrasy – avtordyń (Djoakkıno Rossını) álemge áıgili hám shyǵarmashylyǵynda juldyzdy sátke aınalǵan orkestrlik mýzykasy. Ol túrli sımfonııalyq orkestrlerdiń oryndaýynda, kórkem jáne anımasııalyq fılmderde, sonyń ishinde Ýolt Dısneıdiń áıgili «Fantazııa» týyndysynda oryndalǵanyn bilemiz.
Jalpy, Rossınıdiń sheberligi operanyń dramalyq damýynyń ývertıýrasyndaǵy qysqasha kórsetilimnen, pastoraldyq-ıdıllııalyq beınelerden qaharmandyqqa birtindep kóshýden turady.
Al orkestrmen klarnetke arnalǵan «Kansona» shyǵarmasyn Sergeı Taneev jas kezinde jazǵan. Pesa janrdyń tarıhyn baıandaıdy – ortaǵasyrlyq Provans trýbadýrlarynyń lırıkalyq mýzykasynan bastap Freskobaldı men Iogann Sebastıan Bahtyń aspaptyq kansondaryna deıin jáne kemeldengen Taneevtiń Danteniń sózine jazylǵan «Kansona XXXII» romansymen úndesedi.
Romantızm dáýirinde ataqty vırtýozdar kóptegen konserttik shyǵarma jazdy, biraq qazirgi sahnaǵa tek naǵyz óner týyndylary ǵana saqtalyp jetti. Máselen, Frans Dopplerdiń orkestrmen fleıtaǵa arnalǵan «Vengerskaıa pastoralnaıa fantazııa» jáne atalǵan keshte oryndalǵan Genrık Venıavskııdiń Sharl Gýnonyń orkestrmen skrıpkaǵa arnalǵan «Faýst» operasyndaǵy taqyryptarǵa fantazııasy bar. Bul shyǵarmalar, sózsiz kórkemdik deńgeıimen, jarqyn ulttyq naqyshymen, aspaptardyń vırtýozdyq múmkindikterin tamasha qoldanýymen tanymal.
Klassıkalyq mýzyka keshi kompozıtordyń shyǵarmashylyq shyńdarynyń biri Antonın Dvorjaktyń №9 sımfonııasymen jabyldy. Avtordyń ózi moıyndaǵandaı, «túsine biletin adam sımfonııadaǵy Amerıka áserin sezinýi kerek». Shyǵarma mazmunnyń tereńdigimen, baı áýezdiligimen hám erekshe lırıkasymen baýrap alady. Tórt bólimnen turatyn sıkl Antonın Dvorjaktyń sımfonııalyq orkestrlik mýzykasyna tán dramalyq sharyqtaý shegi desedi.
