Forýmdy ashqan Memlekettik keńesshi Erlan Qarın óz sózinde Májilis konstıtýsııalyq reformany iske asyrýǵa baǵyttalǵan alty zań jobasynyń paketin Senatqa tapsyrǵanyn atap ótti.
«Bul saılaý týraly, Saıası partııalar týraly, Prezıdent týraly, Parlament jáne depýtattardyń mártebesi týraly, Konstıtýsııalyq Sot týraly zańdardyń jobalary. Parlament atalǵan zańdar paketin bir jarym aı ishinde qabyldaıdy dep kútemiz. Bul konstıtýsııalyq reforma aıasyndaǵy zań jobalarynyń alǵashqy paketi ǵana ekenin atap ótkim keledi», dedi Erlan Qarın.
Memlekettik keńesshiniń aıtýynsha, eldegi saıası reformalar arqyly Qazaqstan jalpy postkeńestik keńistikte jańa trend ornatýda.
«Osylaısha, bılik demokratııanyń keń spektrin bastady. Parlamenttiń rólin kúsheıtý, Májilis pen oblystyq máslıhattar depýtattaryn saılaýdyń aralas júıesin engizý, aýyldyq jáne aýdandyq ákimderdiń, qalalyq jáne aýdandyq máslıhattar depýtattarynyń tikeleı saılanýy buǵan dálel bola alady», dep atap ótti ol.
Ol kelesi jyldyń qańtar aıynan bastap azamattardyń quqyqtaryn qorǵaýdyń jańa quqyqtyq jáne ınstıtýsıonaldyq tetikteri iske qosylatynyn qosa aıtty.
«Munyń bári bılik tarmaqtary arasyndaǵy ońtaıly tepe-teńdikpen memlekettik qurylǵynyń jańa ınstıtýsıonaldyq dızaınyn qalyptastyrady. «Kúshti Prezıdent - yqpaldy Parlament - esep beretin Úkimet» qaǵıdaty boıynsha ınstıtýttardyń turaqty júıesi qalyptasady», dedi Memlekettik keńesshi.
