«Bul óńirdiń tranzıttik áleýeti óte zor. Sondyqtan, munda halyqaralyq kólik-logıstıka kompanııalaryn tartý asa mańyzdy. Sol úshin «Qorǵas – Shyǵys qaqpasy» arnaıy ekonomıkalyq aımaǵy qurylǵan. Oǵan qurǵaq port, logıstıkalyq jáne ındýstrııalyq aımaqtar kiredi», dedi Prezıdent.
Qasym-Jomart Toqaev bul jerde 2026 jyldyń sońyna deıin 22 jobany júzege asyrý kózdelip otyrǵanyn aıtty.
«Onyń jalpy quny – 450 mıllıard teńge shamasynda. Degenmen, júkti túsirip, qaıta tıeýge arnalǵan oryndar jáne ony saqtaıtyn qoımalar salý qajet. Osy baǵytta jańa, zamanaýı jobalardy qolǵa alǵan jón», dedi Memleket basshysy.
Sondaı-aq Qasym-Jomart Toqaev memleket kásipkerlikti jan-jaqty qoldaý úshin tıimdi tásilder qoldanyp jatqanyn, atap aıtqanda, granttar, shaǵyn jáne jeńildetilgen nesıeler beriletinin atap ótti.
«Osy óńirdegi eńbekke jaramdy halyqtyń úshten biri shaǵyn jáne orta bıznes salasynda jumys isteıdi. Aımaqtaǵy kásipkerlerdiń sanyn aıtarlyqtaı kóbeıtý úshin memleket tarapynan qoldaý sharalaryn kúsheıtý qajet. Osy maqsatta arnaıy ulttyq joba júzege asyrylyp jatyr. Biraq bul týraly halyqtyń kóbi bilmeı jatady. Sondyqtan, el ishinde bıznesti qoldaý saıasaty týraly aqparattyq-túsindirý jumysyn júrgizý qajet», dedi Memleket basshysy.
