«Qazaqstanda kórikti jerler óte kóp. Osyny utymdy qoldanýymyz kerek. Jetisý oblysynyń ákimdigi týrızmdi damytýǵa aıryqsha mán berýi qajet. Ásirese, Alakól men Balqashtyń orasan zor áleýeti bar. «Altynemel» jáne «Jońǵar Alataýy» ulttyq parki – ekologııalyq týrızmdi damytý úshin taptyrmaıtyn jer. Tekelidegi áıgili Shaja jáne Qora saılary keremet kórinisterge toly. Mine, osynyń bári – tunyp turǵan baılyq», dep atap ótti Prezıdent.
Memleket basshysy óńirge týrısterdi kóptep tartý úshin tıisti ınfraqurylym salyp, qolaıly jaǵdaı jasaý kerek ekenin aıtty. Alaıda, bul – ońaı sharýa emestigin de atap ótti.
«Jetisýdaǵy ulttyq parkterde quny 3 mıllıard teńgeden astam ınvestısııalyq jobalar júzege asyrylmaq. Oǵan iri ınvestorlar tartyldy. Qoryqtarǵa aparatyn joldar jóndelip jatyr. Munda Ortalyq Azııadaǵy eń bıik «Burhan bulaq» sarqyramasyna saı ishimen baratyn jol salynady. Úsharal qalasyndaǵy áýejaıdyń ushyp-qoný jolaǵy jóndeldi», dedi Prezıdent.
Memleket basshysynyń aıtýynsha, ótken eki jylda Alakólde ınjenerlik ınfraqurylymdy damytýǵa bıýdjetten 16 mıllıard teńge bólindi.
«Kóldiń jaǵasynda káriz jelisin salý úshin qurylys jumystary júrgizilip jatyr. Balqashtyń týrıstik áleýetin arttyrý úshin birneshe joba qolǵa alyndy», dep qosty Qasym-Jomart Toqaev.
