2009 jyly 78 jasynda ómirden ozǵan áýlettiń otaǵasy Ospan Baqov uzaq jyl boıy Qorǵantuz orta mektebinde muǵalim, mektep dırektory bolyp abyroıly eńbek etken. Ospan men Shámshııa 1959 jyly shańyraq kóterip, jarty ǵasyrdan astam ýaqyt boıy ómirdiń qıyndyǵy men qýanyshyn birge bólisken jandar.
Osy áýletten órgen bes ul, bes qyzdyń bári búginde bir-bir úıdiń otaǵasy, otanasy atanyp, elimizdiń ár túkpirinde qyzmet etip júr. Ǵasyrǵa jýyq ǵumyr súrgen keıýana kelinderiniń aqylshysy. Otbasylyq sharýalarda uldary da anasynyń aq batasynsyz is bastamaıdy. Uldary men kelinderi, qyzdary men kúıeý balalary áýlettiń yntymaǵy nyǵaıyp, berekesi artýyna Shámshııa ananyń yqpaly kóp bolǵanyn aıtady. Keıýana áli kúnge deıin nemere-jıenderiniń qamqorshysy, nemere kelinderiniń keńesshisi.
Bul – muǵalimder áýleti ári qazaqtyń án-kúıin qurmetteıtin shańyraq. О́ıtkeni Shámshııa ájeıdiń tórt qyzy men bir uly muǵalimdik mamandyqty tańdap, osy salada abyroıly eńbek etip júr. Bir qyzyǵy, Ospan áýletiniń nemereleri men kelinderdiń deni ustazdyq joldy tańdapty. Ospan ataı men Shámshııa ájeıdiń tuńǵyshy Venera qazir zeınetker ustaz, qyryq jyl mektepte abyroıly qyzmet atqarǵan. Odan keıingi muǵalimder tiziminde Jadyra tur, onyń eńbek ótili – 35 jyl, bastaýysh synyp muǵalimi Andjela Ospanqyzynyń eńbek ótili – 28 jyl, Edil Ospanulynyń eńbek ótili – 29 jyl, Álııa Ospanqyzyniki – 22 jyl.
«Mereıli otbasy» baıqaýynyń bıylǵy saıysynda Ospanov áýletiniń úzdik dep tanylýyna áser etken birneshe sebep boldy. Sonyń ishinde eń bastysy – osy áýlet músheleriniń syılastyqqa negizdelgen shynaıy qarym-qatynasy deýge bolady. Kishisi-
niń eresegin qurmetteýi, ózara janashyrlyq, ortaq iske jumylý, meıirimdilik pen izgilik, otbasynyń jazylmaǵan qaǵıdasy eken.
Aqtóbe oblysy
