Alleıanyń ashylýyna kelgen qaýym aldymen dańqty kúıshi Dına Nurpeıisovanyń eskertkishine gúl shoqtaryn qoıdy. Budan keıin Qazaqstannyń eńbek sińirgen qaıratkeri, professor, kúıshi ustaz Orynbaı Dúısen men Almaty aýdanynyń ákimi Maqsat Samatuly «Kúıshiler alleıasynyń» lentasyn saltanatty túrde qıdy.
«Ultymyzdyń kúı óneriniń sańlaqtaryna arnaıy alleıa
ashylyp otyr. Muny Uly dala órkenıetine, qazaqtyń rýhanı kemeldigine qoıylǵan eskertkish dep baǵalaýǵa da bolady. Qazaq tarıhynda Qorqyt baba, Ketbuǵa syndy uly kúıshilerdiń murasy halyq sanasynan óshken joq. Qazaq kúıshileri men kompozıtorlarynyń aty granıt tasqa qashalyp jazylýy baıaǵy kóktúrikterdiń zamanyn eske túsiredi. Kúltegin men Bilge qaǵan jazýlary tasqa qashalyp kúni búginge deıin jetti. Halyq jadynan shyqpaıtyn 101 adamnyń esimi tasqa ǵana emes, ultynyń júreginde jazyldy dep qaraýymyz kerek», dedi jıynda sóz alǵan «Kúı anasy» respýblıkalyq qory janyndaǵy aqsaqaldar alqasynyń múshesi Ýálıhan Qalıjan.
Alleıanyń kireberisine, ortasyna – qazaq halqynyń shańyraǵy, eki jaǵyna – ınstallıasııalyq úlgide mystan quıylyp jasalǵan dombyra men qobyz ornatylǵan.
Qazaqstannyń mádenıet qaıratkeri, dırıjer, kompozıtor Nurlan Bekenovtiń jetekshiligimen elýge jýyq jas kúıshiden quralǵan ulttyq aspaptar orkestri, «Arqa áýenderi» ulttyq ansambli sol jerde kúı oınap, kelýshilerdiń kóńilinen shyǵa bildi.
Belgitasty jasaǵan músinshi Jalyn Baýrqan, al ıdeıa avtory – professor Tólegen Qýanyshev.
