Qazir qazaq dalasynda Sekenniń «Kóńil tolqyny» kúıi oınamaıtyn kún kemde-kem shyǵar. Ataqty týyndysyn kúıshi 24 jasynda jazypty. Odan keıin «Aq jaýyn», «Arýana», «О́kinish» syndy birneshe kúı toptamasy jaryq kórdi. Osy jolǵy keshin «Uly dala» atty týyndysymen ashqan kúıshi «Aqjaılaý», «Erke qusym», «Jazǵy qar», «Asyl ana» kúıleri men basqa da shyǵarmalaryn kúmbirletti. Avtor shyǵarmalaryn Erkeǵalı Rahmadıev atyndaǵy Memlekettik akademııalyq fılarmonııasynyń Qazaq orkestrimen birge oryndady. Qazaq orkestriniń bas dırıjeri – Qazaqstannyń eńbek sińirgen qaıratkeri, «Parasat» ordeniniń ıegeri, professor Aıtqalı Jaıymov.
«Bul keshimdi Respýblıka kúnine arnaımyn» degen avtordyń «Kúltegin», «Kók bóri», «Daraboz» atty kúıleri bir tóbe. Sonymen qatar kesh qonaqtary úshin «Qurmet» ordeniniń ıegeri Janar Júsipova «Tólegetaı baba» kúıin tartsa, Qazaqstannyń eńbek sińirgen qaıratkeri Bıbigúl Qıylymhan «Asyl ana» ánin saldy. Qazaqstannyń eńbek sińirgen qaıratkeri Qaıyrjan Berdibaıdyń oryndaýynda Abaıdyń óleńine jazylǵan «Men bir jumbaq adammyn», Gúlmıra Sarınanyń oryndaýynda «Qońyr jel» jáne ózge de týyndylar shyrqaldy.
Seken Turysbektiń kúıleri kezinde Japonııa men Qytaıda, Fransııa men Italııada halyqtyń erekshe yqylasyna bólengeni belgili. Kúıshiniń birneshe shyǵarmasyn qazaq kórkem fılmderinen tyńdaýǵa bolady, sonyń ishinde «Batyr baıan» fılminiń mýzykasy Seken kúılerimen súıemeldengen.
