Bıyl Stalın men Molotov qol qoıǵan «Qıyr Shyǵystyń shekaralyq aımaqtarynan koreılik turǵyndardy kóshirý týraly» 1937 jyldyń 21 tamyzynda shyqqan qaýlysynyń negizinde koreı halqy ókilderiniń Qazaqstan aýmaǵyna kúshtep kóshirilip kelgenderine 85 jyl tolyp otyr.
Búgingi kórmeniń ekspozısııalary osy tarıhı oqıǵany jan-jaqty ashyp kórsetý maqsatynda uıymdastyryldy. Atap aıtqanda, kórmege qoıylǵan túpnusqalyq arhıv qujattarynda kúshtep kóshirilip ákelingen koreılikterdi burynǵy Qyzyl-Orda, Almaty jáne Ońtústik Qazaqstan oblystarynda ornalastyrý, ondaǵy koreılikterdiń turmystyq jaǵdaıy, Koreı mýzykalyq drama teatrynyń tarıhy, koreılik jazýshylardyń ómiri men shyǵarmashylyq qyzmeti jáne t. b. kórinis tapqan.
Qujattar kórmesine Koreı Respýblıkasynyń Ulttyq arhıviniń ókilderi qatysty. Koreı arhıvshileri nazarlaryna usynylǵan tarıhı derektermen tanysyp, qyzyqtyrǵan suraqtaryna jaýap aldy.
Kezdesý barysynda QR Ortalyq memlekettik arhıviniń dırektory Sábıt Shildebaı eki eldiń bas arhıvteri arasynda ózara yntymaqtastyq kelisimin ornatýǵa shaqyrdy. Bolashaqta qazaqstandyq jáne koreılik arhıvshileriniń arasynda shyǵarmashylyq qatynasty ornatyp, Qazaqstandaǵy koreı dıasporasynyń tarıhyn jan-jaqty zertteýge, sonymen qatar arhıv isin damytý salasy boıynsha da is-sharalar uıymdastyrý jóninde áńgime qozǵaldy.
Sonymen qatar osy qujattar kórmesine Koreıa Respýblıkasynyń azamaty, KIMEP ýnıversıtetiniń magıstranty Djon Mın Ý kelip, tarıhı derektermen tanysyp, bolashaqta óz elin qazaq halqynyń tarıhy jáne mádenıetimen tanystyrýdy maqsat tutatynyn bildirdi.
Sondaı-aq atalǵan qujattar kórmesine «Ashyq qoǵamǵa – ashyq arhıv» atty arhıvshilerdiń halyqaralyq Kongresine Polsha, Iordanııa, О́zbekstan jáne t. b. memleketterden kelgen qonaqtar da qatysty.
