Túrki álemine ortaq «Qorqyt ata» telehıkaıasynyń ssenarııi ótken jyly jazylyp, bıylǵy jyldyń 5 qazanynan túsirilim jumystary bastaldy. Tarıhı týyndy 4 bólimnen turady.
«Dala abyzyna qatysty ańyzdardyń kópshiligi qazaq dalasynda saqtalǵan. О́zderiniń túp-tamyryn, shyǵý tegin Qorqytpen baılanystyratyn halyqtar kóp. Sondyqtan bul telehıkaıa halyqaralyq naryqta tanymal joba bolatynyna senemiz. Eń aldymen, óz tulǵalarymyzdy dáripteýde osyndaı telehıkaıalardyń mańyzy zor», dedi mınıstr D.Qydyráli.
Mınıstr túsirilim tobyna Halyqaralyq Túrki akademııasy zertteýshileriniń Altaıdyń Qaraqaba jazyǵynan tapqan V-VI ǵasyrǵa tıesili qobyzdy paıdalanýdy usyndy. «Qazaqstan» respýblıkalyq teleradıokorporasııasynyń basqarma tóraıymy Lázzat Tanysbaıdyń aıtýynsha, bul Ulttyq arnanyń ózge memleketpen birlese qolǵa alǵan alǵashqy telehıkaıasy.
«Biz úshin alǵashqy tájirıbe jáne alǵash ret óndiris uzaq merzimge sozylyp otyr. Qarasha aıynda О́zbekstannyń Buhara qalasynda túsirilimder bastalady. Serıaldyń ekrandalýy 2024 jylǵa josparlanǵan», dedi basqarma tóraıymy.
Joba prodıýseri buǵan deıin «Qazaqstan» ulttyq telearnasyndaǵy joǵary reıtıngti «Aýyl muǵalimi», «Shyraǵym», «Shabdaly18» telehıkaıalaryna jetekshilik etken Sholpan Batyrbaeva, rejısseri Qanaǵat Mustafın. Q. Mustafın alǵashqy otandyq 100 bólimdi telehıkaıa «Qara shańyraq» serıalynyń rejısseri retinde tanymal. Jobanyń tarıhı keńesshisi – etnograf Berik Júsip. Redaktory – Bolat Jetekbaı. Qorqyttyń ár kezeńdegi rólderine Dinıslam Nurmaǵambet, Ádil Ahmetov jáne Aıdos Bektemir bekitildi.
