Bul merekelik data kitaphanalardyń jumysyn jandandyryp, sala mamandarynyń bedelin arttyrý maqsatynda Mádenıet jáne sport mınıstrliginiń bastamasymen bekitilgen edi. Atalǵan merekege oraı el astanasynda alqaly jıyn ótip, oǵan Mádenıet jáne sport mınıstri Dáýren Abaev qatysty. Saltanatty is-shara aıasynda kitaphanashylarǵa «Mádenıet salasynyń úzdigi» tósbelgisi tapsyrylyp, Qurmet gramotasymen jáne Alǵys hattarmen marapattaldy.
«Elimizdegi 70 mıllıon dana kitap qoryna qamqorlyq tanytyp júrgen barsha kitaphanashylardy kásibı merekemen quttyqtaımyn. Meniń oıymsha, kitaphana isiniń qajettiligine jáne kitaphana isiniń kúrdeliligine eshkim kúmán keltirmeıdi. Degenmen qoǵam arasynda «kitaphanalardyń ǵasyry aıaqtaldy, olardyń qyzmeti qaǵaz tasyǵyshtar dáýirindegi atavızm retinde eskiredi, ınternet pen sıfrlyq transformasııa arqasynda qoǵamdyq kitaphananyń ornyn bir ǵana smartfon basa alady» degen syndy teris pikirler bar. Mundaı pikirmen túbegeıli kelispeımin. Jalpy, tehnologııaǵa kózsiz tabyný men sıfrǵa degen soqyr senim bizdiń urpaqtyń sanasyn qundylyqtarǵa tereń boılaýǵa múmkindik bermeı, adastyrady dep sanaımyn», dedi Dáýren Abaev.
Mınıstrdiń aıtýynsha, qazirgi zamanǵy kópshilik kitaphananyń fýnksıonaldyǵy kitaptardy saqtaý, júıeleý, sıfrlandyrý jáne oqyrmandarǵa usyný sheńberinen áldeqaıda kóp baǵytty qamtıdy. Bul rette atalǵan vedomstvo kitaphanalar jumysynyń jańa qaǵıdattary men standarttaryn kezeń-kezeńimen engizýmen aınalysýǵa daıyn.
«Kitaphana – bul bilimge úńilip, sanaly túrde, jaıly ortada oqýǵa keletin ǵıbadathana. Bizdiń kúndelikti kúıbeń tirlik qarbalastan arylyp, rýhanııat álemine enýge múmkindik týǵyzatyn qasterli oryn. Sondyqtan kitaphana isin qoldaıtyn bolamyz. Bul bizdiń berik ustanymymyz», dep túıindedi mınıstr.
Aıta keteıik, búginde elimizde 11 myńnan asa kitaphana jumys isteıdi. Onyń 7 myńnan astamy bilim berý júıesine qarasty bolsa, 3 myńnan astamy mádenıet jáne sport salasyna qaraıdy.
