B.Rımova atyndaǵy Jetisý oblystyq teatrynyń ǵımaratyna jınalǵan kópshilik aldymen Memlekettik Týdyń ákelýine kýá bolyp, Gımndi tik turyp oryndady. Odan soń merekelik sharaǵa kelgen kópshilikti quttyqtaǵan óńir basshysy Prezıdent Qasym-Jomart Toqaevtyń bastamasymen ulttyq mereke mártebesin alǵan Respýblıka kúniniń mańyzyna toqtalyp, Egemendik týraly deklarasııanyń ult tarıhyndaǵy ornyn aıshyqtady.
«Memleket basshysy Qasym-Jomart Kemeluly Toqaev elimizdiń basty merekesi retinde Respýblıka kúnin qaıta qalpyna keltirýdi usynǵan bolatyn. Bul bastama qoǵam tarapynan qyzý qoldaý tapty. Egemendik týraly deklarasııa qabyldanǵan 1990 jylǵy 25 qazanda táýelsizdigimizdiń alǵysharty jasaldy, betke alar baǵytymyz aıqyndaldy. Bul kún biz úshin sonysymen qundy. Qazaqstan – bizdiń ómir súrip otyrǵan ortaq Otanymyz. Sondyqtan onyń taǵdyry, búgini men bolashaǵy eldiń árbir azamatyna tikeleı qatysty», dedi B.Isabaev.
Merekelik quttyqtaý sózden keıin oblys ákimi óńirdiń damýyna zor úles qosqan birqatar jetisýlyq azamatty «Qurmet», «Eńbek dańqy» III dárejeli ordenderimen, «Eren eńbegi úshin», «Shapaǵat» medaldarymen, Qazaqstan Respýblıkasynyń Qurmet gramotasymen marapattap, «Qazaqstannyń eńbek sińirgen qaıratkeri», «Jetisýdyń Qurmetti azamaty» ataqtaryn berdi. Osy rette «Qurmet» ordenin alǵan Eskeldi aýdanyndaǵy «Cherkashına» sharýa qojalyǵynyń jetekshisi Zınaıda Cherkashına da óz lebizin jetkizdi.
«Eskeldi aýdany – agrarly aımaq. Osy óńirde eki márte Sosıalıstik Eńbek Eri Nurmolda Aldabergenov pen basqa da 19 Eńbek Eri shyqqan. Biz sol erlerdiń jolyn laıyqty jalǵastyryp kelemiz. Memleket basshysynyń agrarlyq salany damytý týraly tapsyrmasyn oryndaýǵa belsene atsalysamyz. Búgingi marapat tek meniki ǵana emes, jerlesterimmen birge jasaǵan jumysymyzdyń ortaq nátıjesi dep bilemin», dedi Z.Cherkashına.
Respýblıka kúniniń qurmetine oraı marapattalǵan jandardy «Qazaqstannyń eńbek sińirgen qaıratkeri» ataǵyn alǵan aqyn Aıtaqyn Bulǵaqov, «Jetisý oblysynyń Qurmetti azamaty» ataǵyn alǵan eńbek ardageri, KSRO «Qurmet belgisi», «Halyqtar dostyǵy» jáne «Qurmet», «Parasat» ordenderiniń ıegeri Asylmurat Turǵanbekov quttyqtap, júrekjardy tilegin arnady.
Saltanatty is-shara sońy Jetisý oblystyq fılarmonııasynyń ónerpazdary daıyndaǵan konserttik baǵdarlamaǵa ulasty.
Jetisý oblysy
