Elorda turǵyndary páterlerin «Nurly jer» baǵdarlamasy («Shańyraq» memlekettik baǵdarlamasy) boıynsha aldy. Turǵyn úı baǵdarlamasyn Astana ákimdigi Otbasy bankimen birlesip iske asyrdy.
Búgin Astana ákimi Altaı Kólginov pen Otbasy bankiniń basqarma tóraǵasy Lázzat Ibragımova barsha qazaqstandyqtardy Respýblıka kúni merekesimen, al jańa baspana ıelerin qonys toıymen quttyqtady.
«Respýblıka kúnimen jáne kópten kútken qonys toıymen quttyqtaımyn! Úılerińiz qurylys qarqyndy júrip jatqan jańa aýdanda (Jaǵalaý shaǵyn aýdany, E-20 kóshesi) ornalasqan. Munda biz jaqynda 4 myń oqýshyǵa arnalǵan 2 aýysymdy mektep ashtyq. Kóktemde biz aýdandy abattandyrýdy jalǵastyramyz, áleýmettik nysandar salamyz.
Memleket turǵyn úı máselesine erekshe nazar aýdarady. Jyl saıyn qoljetimdi jeńildikti turǵyn úı salamyz. Mysaly 2018 jyly 1800 áleýmettik páter, 2019 jyly osyndaı 2900 páter salynsa, sońǵy eki jylda 17 myńǵa jýyq áleýmettik páter qoldanysqa berildi. Sonymen qatar, turǵyn úı baǵdarlamalaryna qatysýshylar sanaty keńeıdi, turǵyn úı sertıfıkatynyń somasy 1 mıllıonnan 1,5 mln teńgege deıin ulǵaıdy», dep atap ótti elorda ákimi Altaı Kólginov.
Jyl basynan beri Astanada barlyǵy 19 335 osyndaı nesıe berildi. Kún saıyn elordanyń 80-ge jýyq turǵyny óz páterin nemese úıin Otbasy banki arqyly satyp alý úshin nesıe alady. Sol sııaqty kún saıyn 100-130 adam jyljymaıtyn múlikti odan ári satyp alý úshin jańa depozıtter ashady.
«Jańa qonystanýshylarymyzdyń búgin jańa ómiri bastaldy - jańa páterlerde olar endi jaıly ómirde urpaq tárbıelep, aldaǵy ómirlerine jospar quryp, qonaq kútetin bolady. Baspana kiltin tabystaý ulttyq merekege sáıkes kelgeni merekeniń mańyzyn arttyra túsedi. Memleket óz azamattarynyń baspana máselesin sheshýge erekshe kóńil bóletini mańyzdy. Tek «Shańyraq» baǵdarlamasy aıasynda eki jyl ishinde biz 16 722 qazaqstandyqqa jeke turǵyn úı satyp alýǵa kómektestik, onyń ishinde Astanada 4 363 adam qonys toıyn atap ótti. Jaqyn arada otbasy banki memlekettik baǵdarlamalar aıasynda azamattarǵa kredıt berýdi jalǵastyrý úshin 49,9 mlrd teńge kóleminde qarajat túsýin kútip otyr», dedi Otbasy bankiniń basqarma tóraǵasy Lázzat Ibragımova.
Jyl basynan beri Otbasy Banki 67 390 qazaqstandyqqa qonys toıyn atap ótýge kómektesti.
