Qazannyń sońǵy jeksenbisinde Qazaqstan Respýblıkasynda Áleýmettik qorǵaý júıesi qyzmetkerleriniń kúni atap ótiledi. Bul merekede alǵys sózder áleýmettik qamsyzdandyrý júıesin damytýǵa erekshe úles qosqan qyzmetkerlerge arnaldy. Áleýmettik salanyń barlyq qyzmetkerlerin Astana ákiminiń orynbasary Erlan Bekmýrzaev quttyqtap, Qazaqstan Respýblıkasynyń Eńbek jáne halyqty áleýmettik qorǵaý mınıstri Tamara Dúısenova men Astana ákimi Altaı Kólginovtiń atynan jyly lebizderin bildirdi.
«Qurmetti áriptester, qala ákiminiń atynan jáne óz atymnan Sizderdi merekemen, áleýmettik qorǵaý júıesi qyzmetkerleriniń kúnimen quttyqtaımyn! Áleýmettik qyzmetkerlerdiń kúndelikti eńbegi-memlekettiń óz azamattaryna qamqorlyǵynyń kórsetkishi. Mundaı merekeniń bolýy Sizdiń qıyn janqııarlyq jumysyńyzǵa shynaıy qurmettiń baryn kórsetedi. Bul jaqsy dástúr bárimizge janashyrlyq pen ózara kómek qajet ekenin eske salýy kerek. Sizderdi osy tamasha kúnmen quttyqtaımyn!», dedi spıker.
Qazirgi ýaqytta elordada segiz arnaıy áleýmettik qyzmet kórsetý ortalyǵy jumys isteıdi, onda ekonomıkalyq, áleýmettik-pedagogıkalyq, áleýmettik-turmystyq qyzmetter kórsetiledi. Munda múgedektigi bar adamdarǵa ómirdiń dámin tatýǵa, balalarǵa aıaǵynan turýǵa jáne alǵashqy qadamdaryn jasaýǵa kómektesedi. Jalpy, memleket tarapynan kómekke muqtaj adamdardyń ómirin jeńildetedi.
«Biz bul sharany áleýmettik qorǵaý júıesiniń qyzmetkerlerin marapattaý úshin uıymdastyrdyq. Árıne, olar úshin eń jaqsy marapat – kómek kórsetilgenderdiń alǵysy, biraq biz olardyń mańyzy zor jumysy úshin memleket atynan da rızashylyǵymyzdy bildirgimiz keledi. Qyzmetkerlerimizdiń barlyq týystary men jaqyndaryna densaýlyq tileımin. Bizdiń jumysymyz úlken shydamdylyq pen tózimdilikti qajet etetindikten Sizderge shydamdylyq tileımin.
Qyzmet alýshylar tarapynan árqashan túsinistik bolsyn. Olardyń árqaısysynyń óz problemalary bar jáne olar bizdiń jyly kózqarasymyz ben qamqorlyǵymyzdy qajet etedi. Sizderge sergektik tileımin, jáne bizdiń qyzmetkerlerimizdiń kózderi tek búgin ǵana emes árdaıym baqyttan jarqyraı bersin!», dep atap ótti Astana qalasynyń Jumyspen qamtý jáne áleýmettik qorǵaý basqarmasynyń basshysy Ilıa Skýb.
Is-shara barysynda áleýmettik qorǵaý salasynyń úzdik mamandary Eńbek jáne áleýmettik qorǵaý mınıstrliginiń «Áleýmettik-eńbek salasynyń úzdigi», «Eńbek ardageri» vedomstvolyq nagradalarymen, Astana ákiminiń gramotalarymen, elorda basshysynyń jáne ákim orynbasarynyń alǵys hattarymen marapattaldy. Sonymen qatar, is-sharaǵa ardagerler, áleýmettik qorǵaý bólimderiniń basshylary, áleýmettik qyzmetkerler jáne úkimettik emes uıymdardyń ókilderi qatysty.
«Barlyq áriptesterimdi kásibı merekelerimen, áleýmettik qorǵaý qyzmetkerleriniń kúnimen shyn júrekten quttyqtaımyn. Bul mereke meıirimdilikti, adaldyqty, shynshyldyqty jáne eń bastysy, eresek urpaqqa, múgedektigi bar adamdarǵa, biz jumys isteıtin barlyq sanattarǵa qurmetpen qaraýdy bildiredi. Men áleýmettik qorǵaý salasynda 15 jyldan astam jumys isteımin. Memleket bizdiń eńbegimizdi atap ótetini men úshin úlken qýanysh. Biz óz jumysymyz úshin marapattar men maqtaýlardy talap etpeımiz, biraq olardy alǵan kezde – shabyttanyp, odan da kóp jumys isteı bastaımyz», dedi «Úmit daǵdarys ortalyǵy» KMM qyzmetkeri Altyn Erýbaeva.
Aıta keteıik, búginde elordanyń áleýmettik qorǵaý júıesinde 1300-den astam áleýmettik qyzmetker jumys isteıdi. Áleýmettik qyzmetkerler kún saıyn myńdaǵan zeınetkerler men múgedektigi bar 3000 balaǵa qamqorlyq pen kóńil bóledi.
