Jerimizdiń búgingi tutastyǵy kóńilge demeý. Biraq «elimizdiń yntymaǵy men birtutastyǵynyń deńgeıi qandaı?» degen saýalǵa shynaıy jaýap berilmeı kóńildi semirtý, ózimizdi ózimiz aldarqatý adastyrady. Sonymen qatar «Qazaqstan azamattarynyń ortaq múddesi ne?» degen suraqqa da qoǵam ishinen jaýap berilýge tıis. Al halyqtyń ortaq múddesi naqtylanbaı, onyń aınalasyna jınalmaı el birligi myǵym dep arqany keńge salý ábestik bolar edi.
Búginde qoǵamymyzda halqymyzdyń myzǵymas birligine kúmánmen qaraıtyndar barshylyq. Olar el birliginiń nyǵaıyp kele jatqanyn dáleldegisi kelip janushyryp júrgenderdiń sózderine senbeıdi ári oǵan kekesinmen qaraıdy. Demek atqarýshy bılik «Halyq únine qulaq asatyn memleket» tujyrymdamasyn basshylyqqa ala otyryp, el birligine túsken qandaı syzattar bar ekenin zerttep-zerdelep, odan qorytyndy shyǵaryp, eger qandaı da bir kinárattar tabylyp jatsa, olardyń bastaýynda turǵan sebepterdi anyqtap jáne olardy joıý kerek. Biz bul sózdi tekten-tekke aıtyp otyrǵanymyz joq. О́ıtkeni el yntymaǵynyń búgingi deńgeıine qatysty aıtylyp júrgen syn-eskertpeler negizsiz emes. Buǵan qoǵamymyzda kezdesip jatatyn ultaralyq kelispeýshilik syńaıyndaǵy oqıǵalardy qosa alǵanda áleýmettik jelilerdegi kóńil kúıler aýany dálel bola alady. Osy jerde aıta keteıik, ultaralyq kelispeýshilik, ókpe-renish, daý-janjal yńǵaıyndaǵy oqıǵalardy «turmystyq kelispeýshilik, janjal» dep, birligimizdiń myqtylyǵyna shań jýytqymyz kelmeıdi. Bul olqylyq máseleniń mánisine tereńnen úńilýge mursha bermeıdi. Osylaısha, «jaýyr jaba toqylyp» kete barady. Bulaı jalǵasa berse túbinde birligimizdiń shynaıy deńgeıimen ne kórinisimen betpe-bet kelip, qutymyz qashyp, esimizdi jııa almaı qalýymyz ábden múmkin.
Handyǵymyzdan aıyrylyp, el tizgini ózgeniń qolyna túsken kezden táýelsizdigimizdi alǵanǵa deıingi aralyqta qazaqty mensinbeýshilik, tómen sanaýshylyq sııaqty jaǵymsyz úrdister beleń aldy. Biraq bul úrdis táýelsizdik alǵannan keıin óz «júrisin» toqtatýy kerek edi, olaı bolmady. Qaıta údep barady.
Moıyndaýymyz kerek, biz táýelsizdik alǵan alǵashqy sátterdegi qoǵamymyzdyń ishki qaıshylyqtarynan áli kúnge ajyraǵan joqpyz. Naqtylaı aıtqanda, qazaq ultynyń atynyń ozýyna búkil jan dúnıesimen qarsy shyqqan, qazaq dese júregi qataıyp, qaqaıyp qalǵan jerlesterimizdiń sol kezdegi týdyrǵan qoǵamdyq kóńil kúı aýany áli kúnge seıilmeı otyr. Dáliregi táýelsizdik tańy atqan tustaǵy saıası-qoǵamdyq aýyr atmosferanyń aýylynan qarǵa adym alystamadyq. Beıne bir ýaqyt kóshinen túsip qalyp, sol toqsanynshy jyldarda qalyp qoıǵandaımyz.
Keńestik júıe ydyraǵan tusta óz otandastarymyzdan quqaıdyń neshe atasyn kórgenimiz esten shyǵar ma? «Internasıonaldyq mindet», «ultaralyq teń qatynas», «myzǵymas dostyq», «halyqtar dostyǵy jasasyn» degen tirkesterdi kún saıyn jaqtary talmaı aıtatyn kóptegen azamat Qazaqstannyń egemendigi synǵa túsip, aqyrynda Qudaı buıyrtyp táýelsizdik tańy atqanda qabaqtaryn tars jaýyp, syrt aınalǵandary, jas táýelsiz eldiń alǵashqy qadamdaryna kedergi jasap baqqany umytqyń kelse de oıdan ketpeıdi. Bir ókinishtisi sol, olardyń kópshiligi joǵary bilimdi, túrli deńgeıdegi basshylyqtarda qyzmet etip júrgen azamattar edi. Osyndaı kertartpa kózqarastaǵylardyń ishki pıǵyly – Qazaqstannyń derbes el bolmaýy. Mine, osyndaılar, qazaqqa tóbeden mensinbeı qaraǵysy keletinder legi qazirgi tańda da azaımaı otyrǵanyn anyq sezesiń. Mundaılardy biz ózimizge qanshalyqty tartsaq ta olar ózin Qazaqstannyń tól balasy dep esepteı almaıdy. Burynǵy otarshyldyq kózqarastan ajyramaǵan kesirler kerýeni áli kúnge deıin óz kóshterin túzep kele jatqany qynjyltady. Otyz jyldan astam ýaqyt ótse de jat pıǵyldylardyń úni áli kúnge qatty shyǵýda. Bul bizdi ult retinde uıystyra almaı otyrǵan ulttyq ıdeologııanyń joqtyǵynyń naqty kórinisi. Bul – úlken kinárat. Ony joımaı, táýelsizdigimizdi baıandy jolǵa túsirý qıyn.
