Otyrys barysynda Mańǵystaý oblysy ákiminiń birinshi orynbasary B.Orynbasarov óńirdegi ónerkásip salalarynyń aǵymdaǵy jaǵdaıy, kásipkerlerge jasalyp jatqan qoldaý sharalary, ekonomıkalyq aımaqtyń qyzmetindegi aǵymdaǵy máseleler men aldaǵy josparlary týraly baıandama jasady. Sondaı-aq jergilikti ýákiletti organdardyń, ekonomıkalyq aımaq basshylyǵynyń aqparaty men esepteri, ekonomıkalyq aımaqtardyń qyzmetin retteıtin ortalyq ýákiletti organnyń zańnamalarǵa engizetin ózgerister men tolyqtyrýlar týraly aqparaty tyńdaldy.
Senattyń Qarjy jáne bıýdjet komıtetiniń depýtattary arnaıy ekonomıkalyq aımaqtardyń qyzmetin jetildirý tetikterin zerdeleý maqsatynda AEA-nyń birqatar nysandaryn aralady.
Senatorlar elimizdegi qolaıly ınvestısııalyq ahýaldy damytýǵa jáne eksportqa baǵdarlanǵan jobalardy iske asyrý úshin otandyq jáne sheteldik ınvestısııa tartýǵa baǵyttalǵan «Aqtaý teńiz porty» AEA-da boldy. Depýtattar ekonomıkalyq aımaqtyń jalpy aýmaǵy 9 sýbaımaqtan turatyny jáne aýdany 2 140 gektardy quraıtyny týraly habardar boldy.
Parlamentshiler sonymen qatar jol bıtýmyn óndirý kásipornynyń jumysymen tanysty jáne «Quryq» porty men «Aqtaý teńiz saýda» portynda boldy.
«Bizdiń aımaqqa kelýimizdiń maqsaty – arnaıy ekonomıkalyq aımaq qyzmetimen tanysý, qurylystyń aıaqtalmaýy jáne ınfraqurylymdy júrgizý, óńdeý ónerkásibine jeke ınvestısııalardy tartý deńgeıi boıynsha máselelerdi talqylaý, sondaı-aq arnaıy ekonomıkalyq aımaqtarda qoldanystaǵy jáne iske asyrylyp jatqan jobalardy qarastyrý», dedi komıtet tóraǵasy S.Trumov.
«Aqtaý teńiz porty» arnaıy ekonomıkalyq aımaǵynda qazirgi tańda 47 kompanııa tirkelgen, 1 700-den astam jańa jumys ornyn qurýmen jalpy kólemi 266,1 mlrd teńge quraıtyn ınvestısııalar, onyń ishinde 168,7 sheteldik ınvestısııalar salyndy, 406,7 mlrd teńgege ónim óndirilip, 54,2 mlrd teńge salyq tólendi. Atalǵan kórsetkishter boıynsha «Aqtaý teńiz porty» arnaıy ekonomıkalyq aımaǵy elimizdegi ekonomıkalyq aımaqtar kóshbasshylarynyń qataryna kirip otyr.
Qazirgi ýaqytta eksporttyń negizgi arnalary Ázerbaıjan, Reseı, О́zbekstan, Ýkraına, Germanııa, Fransııa elderi bolsa, aımaqtaǵy sheteldik ınvestorlar Qytaı, Ulybrıtanııa, Ázerbaıjan, Sıngapýr, Túrkııa, Germanııa memleketteri sanalady.
Negizgi baǵyttary óńdeý ónerkásibi, ıaǵnı materıaldar óndirisi, munaı-hımııa, qurylys ónerkásibi úshin materıaldar, mashınalar men jabdyqtar óndirý, qoıma jáne logıstıka, týrızmdi damytý bolyp tabylatyn ekonomıkalyq aımaqta 25 óndiristik qyzmetke basymdyq berilgen.
Ekonomıkalyq aımaqta jobalardy iske asyrý úshin barlyq jaǵdaı jasalǵan, qajetti ınfraqurylym júrgizilgen, salyqtyq jáne kedendik preferensııalar usynylady. Sonymen qatar jobalardy qoldaý jáne olardyń monıtorıngi júzege asyrylady, ınvestorlarǵa jergilikti atqarýshy jáne ýákiletti organdarmen, mamandandyrylǵan uıymdarmen ózara is-qımyl jasaýda járdem kórsetiledi.
Aldaǵy ýaqytta óńirdiń kólik-logıstıkalyq áleýetin arttyrý boıynsha is-sharalardy iske asyrý josparlanǵan. Osy maqsatta Aqtaý teńiz saýda portynyń AEA qatysýshylary retinde tirkeı otyra, «Baýtıno» júk aýdany men Quryq portynyń aýmaǵyn AEA quramyna qosý týraly máselesi tıisti memlekettik organdardyń qaralýyna jiberilgen. Osy is-sharalar aıasynda Memleket basshysy Q.Toqaevtyń óńirde konteınerlik hab qurý jónindegi tapsyrmasyn iske asyrý AEA aýmaǵynda da josparlanyp otyr, ekonomıkalyq aımaqta aýdany 19 ga jer ýchaskesi rezervke qoıylǵan.
Otyrys qorytyndysy boıynsha Parlament Senatynyń depýtattary ekonomıkalyq aımaqtardyń damýyna baǵyttalǵan pikirlerin bildirip, ekonomıkalyq aımaqtardyń elimizdiń áleýmettik-ekonomıkalyq damýyndaǵy ornyn erekshe atap ótti. Ekonomıkalyq aımaqtyń óńirde jumys isteýi eleýli áleýmettik-ekonomıkalyq tıimdilik ákeledi jáne óńirge ınvestısııalar tartý úshin qolaıly alań bolyp tabylatyndyqtan, olar «Aqtaý teńiz porty» arnaıy ekonomıkalyq aımaǵyn damytýǵa qajetti is-sharalardy anyqtap, bul baǵyttaǵy jumystardy kúsheıtý qajettigin atap ótti.
Depýtattar komıtet músheleriniń óńirlerge saparynyń qorytyndysy boıynsha «Arnaıy ekonomıkalyq aımaqtardyń naqty jaı-kúıi jáne jumys isteýiniń aldaǵy perspektıvalary» taqyrybynda keńeıtilgen dóńgelek ústel ótkiziletinin aıtty. Onda osy saparda kóterilgen barlyq másele talqyǵa salynady.
Mańǵystaý oblysy
