Is-sharany Qazaqstan Respýblıkasy Aqparat jáne qoǵamdyq damý mınıstrligi qoldaýymen Qazaqstandyq qoǵamdyq damý ınstıtýty uıymdastyrdy.
Baıqaýdyń maqsaty - balalar men jasóspirimderdiń kitap oqýǵa degen qyzyǵýshylyǵyn arttyrý, qazaq jáne shetel ádebıetin, aqyn-jazýshylardyń shyǵarmalaryn tereń zertteýge tartý, óskeleń urpaqtyń boıynda patrıottyq sezimdi qalyptastyrý.
Baıqaýǵa elimizdiń jalpy bilim beretin mektepteriniń 3-10 synyp oqýshylarynan 97 myńnan astam bala qatysty. Olar aýdandyq, qalalyq, oblystyq irikteýlerden ótti. Baıqaýǵa qatysýshylar 4 sanat boıynsha baq synady:
«Ertegiler áleminde» taqyrybynda bastaýysh 3-4 synyp oqýshylaryna arnalǵan kitaptar («Qazaq ertegileri» jáne «Alpamys batyr»);
«Kel, balalar, oqylyq!» taqyryby 5-6 orta synyptaǵy oqýshylarǵa arnalǵan kitaptar («Men – apamnyń balasymyn» jáne «Aǵaıyndy Grımmder ertegileri» atty);
«Ǵasyrlar tarıhty jyrlaıdy» taqyryby 7-8 synyptaǵy jasóspirim balalarǵa arnalǵan kitaptar («Ushqan uıa» jáne «Gýllıverdiń saıahaty»);
«Uly Dala epostary» jáne «Uly Dalanyń dańqy» taqyryby 9-10 joǵary synyp oqýshylaryna arnalǵan kitaptar (I. Esenberlın «Kóshpendiler.Almas qylysh» jáne Danıel Defo «Robınzon Krýzo»).
Oblystyq týrlardyń 80 jeńimpazy 2022 jyldyń 2 qarashasynda baıqaýdyń aqtyq saıysyna qatysty.
Baıqaý qorytyndysy boıynsha jeńimpazdardy saltanatty marapattaý rásimine Aqparat jáne qoǵamdyq damý vıse-mınıstri, Parlament depýtattary, Qazaqstandaǵy IýNISEF ókilderi, qoǵam qaıratkerleri, aqyn-jazýshylar men jýrnalıster qatysty.
Is-sharaǵa qatysýshylardy quttyqtap Aqparat jáne qoǵamdyq damý vıse-mınıstri Danııar Qadyrov sóz sóıledi. Ol óz sózinde: «Respýblıkalyq balalar oqýyna elimizdiń túpkir-túkpirinen súrinbeı ótken júzden júırik qatysýshylarymyzdy baıqaýdyń mejesine jetýimen shyn júrekten quttyqtaımyn. Oraıy kelip turǵanda barshańyzdy tuǵyryna qaıta qonǵan ulttyq merekemiz Respýblıka kúnimen de quttyqtaımyn», dep ystyq iltıpatyn bildirdi.
«Bul baıqaý kitap oqý mádenıetimen qatar memlekettik tildiń jas býyn ortasynda keń taralýyna úles qosady. Atalmysh áıgili týyndylar adamnyń ómir jolynda ólsheýsiz azyq bolyp, parasatty, kemel jastardy qalyptastyrýǵa yqpal etip keledi. Osyndaı azamattarmen birge biz Jańa Qazaqstandy jáne qoǵamdaǵy izgi qundylyqtardy qalyptastyramyz», dedi vıse-mınıstr.
Aqparat jáne qoǵamdyq damý vıse-mınıstri Danııar Qadyrov, QR Parlamenti Májilisiniń depýtattary Saýytbek Abdrahmanov men Amanjol Áltaı, Qazaqstandaǵy IýNISEF basshysynyń keńesshisi Baǵdad Qulnazarov, QR Jazýshylar odaǵynyń músheleri, aqyn-jazýshylar Serik Negımov, Sharhan Qazyǵul, Dıhan Qamzabekuly, Qýanysh Jıenbaı jáne Roza Muqanova tıisti nomınasııalar boıynsha jeńimpazdar men júldegerlerdi baǵaly syılyqtarmen marapattady.
Saltanatty rásim barysynda eń belsendi qatysýshylarǵa alǵys hattary men Marwin sertıfıkattary tabystaldy.
