Daıyndyq máseleleri jónindegi keńes

Elbasy Nursultan Na­zarbaev Joǵary Eýrazııalyq ekonomıkalyq keńestiń mem­leket basshylary deń­geıindegi otyrysyn ótkizýge daıyndyq máseleleri jó­nin­de keńes ótkizdi, dep habarlady Prezıdenttiń baspasóz qyzmeti. Jıyndy ashqan Memleket basshysy osy aptada Eýrazııalyq ekonomıkalyq odaq qurý týraly shartqa qol qoıý josparlanyp otyrǵanyn aıtty. – Biz jıyrma jyl boıy eko­no­mıkalyq ıntegrasııa baǵytynda ilgeriledik. Osy ýaqytqa deıin orasan jumys atqaryldy. Endi sol jumysymyzdyń beker bol­maǵanyn, qol qoıylǵan shart­tyń halyq ıgiligine arnalǵanyn is júzinde dáleldeýge tıispiz. Elimiz uzaq merzimdi bolashaqqa josparlanǵan bul Odaqtan paıda kóredi. Biz shartqa  ekonomıkalyq turǵydan tıimdi bolǵandyqtan qol qoıýǵa umtylyp otyrmyz. Atap aıtsaq, bizdiń elimizdiń teńiz­ge shyǵatyn joly joq eke­nin eskerý kerek, muny jáne kólik ınfraqurylymyna qolje­tim­dilikti kórshilerimiz qamtamasyz etetin bolady, – dep atap ótti Qazaqstan Prezıdenti. Memleket basshysy kór­shi­lerimizben tyǵyz ekonomıkalyq baılanys Qazaqstannyń damýyna oń áserin tıgizetindigin atap kór­setti. – Bizdiń elimizde shyǵarylǵan taýarlar Reseı men Belarýstiń naryqtarynda básekege túsýi tıis. Qazaqstan taýarlarynyń, kapıtalynyń, jumys kúshiniń erkin qozǵalysy, birlesken kásiporyndar qurý, sondaı-aq, baı­lanystardy kúsheıtý – osy­nyń bári elimizdiń ekonomıkasyna paıdasyn tıgizedi, – dedi Nur­sultan Nazarbaev. Premer-Mınıstr K.Másimov sharttyń jobasy Qazaqstan Pre­zıdentiniń tapsyrmasyna sáı­kes daıyndalǵanyn jáne onda asa mańyzdy birneshe másele qam­tyl­ǵanyn málimdedi. – Odaq bizdiń elimizge qazir­gi­deı týrbýlentti ekonomıka jaǵdaıynda turaqty ári ornyqty damý úshin zor ekonomıkalyq múmkindikter beredi. Bul shartta kópvektorly saıasat júrgizý múmkindigi qarastyrylǵan. Osy Odaqqa qatysýdan bólek, biz DSU-ǵa kirý jónindegi kelis­sóz­derdi jáne ózge de halyqaralyq bir­les­tik­termen kelisimder jasaýdy jal­ǵastyramyz, – dedi Premer-Mınıstr. K.Másimov jalpy qujattyń 4 bólikten, 28 bólimnen, 118 baptan jáne 32 qosymshadan turatynyn da atap ótti. Premer-Mınıstrdiń birinshi orynbasary B.Saǵyntaev búgingi tańda Úkimettiń tıisti qaýlysyn kelisimdeý men qabyldaýdyń mem­leketishilik rásimderi aıaqtalǵanyn málimdedi. – Shart jobasy táýelsiz sa­rapshylardyń saraptamasynan ótti. Sizdiń ustanymyńyz ben tapsyrmalaryńyzdy basshylyqqa ala otyryp, shart jobasymen jumys barysynda ekonomıkalyq emes erejeler alynyp tastaldy. Kelissózder barysynda biz Odaqty saıasılandyrýǵa jáne onyń aıasynda ulttyq óki­let­ti­lik pen memlekettik ege­men­dik máselelerin talqylaýǵa bolmaı­tyndyǵy týraly usta­nymdy qorǵap qaldyq. Siz­diń nusqaý­laryńyz ben tapsyrmalaryńyz júzege asyrylǵanyn, shart jobasy taraptarmen kelisilip, qol qoıýǵa daıyn ekenin taǵy bir ret atap ótkim keledi, – dedi B.Sa­ǵyntaev. Syrtqy ister mınıstri E.Ydy­rysov shart jobasynyń ınstı­týttyq  bóliginde egemendikti, aýmaqtyq tutastyqty, árbir múshe-memlekettiń saıası qurylymynyń ereksheligin qurmetteý, sondaı-aq, sheshim qabyldaýdaǵy konsensýs qaǵıdattary qarastyrylǵanyn aıtty. – Odaq organdarynda mú­she-memleketter ókilderiniń kon­kýrstyq negizde teń bolýy qamta­masyz etildi. Bul sharttyń ózge halyqaralyq sharttardy jasaýǵa kedergi keltirmeıtini aıryqsha mańyzdy. Instıtýttyq bólikte týyndaǵan barlyq túıtkilder joı­yldy, – dedi E.Ydyrysov. Sýretti túsirgender S.BONDARENKO, B.OTARBAEV.