«Aqtóbe qalasyndaǵy saılaýaldy shtabyna saılaýshylar saýaldary men usynystaryn belsendi joldaýda. Bul qýantarlyq jaǵdaı. Sondaı-aq halyqaralyq saılaý baıqaýshylary joldaǵan suraqtarmen de jumys júrgizilýde. Jalpy, el óńirlerinde 20 shtab jumys isteıdi, 2 myńǵa jýyq erikti jumyldyrylǵan. Saılaýshylarǵa yńǵaıly bolý úshin úlken aýdandyq ortalyqtarda da shtabtar ashylǵan», dep málimdedi Q.Ábden.
Eske salsaq, Qaraqat Ábden buǵan deıin Aqmola oblysy, Qaraǵandy, Astana, Ekibastuz, Semeı, Pavlodar, Talǵar, Esik qalalarynyń turǵyndarymen saılaýaldy kezdesýlerin ótkizdi. Basqosýlar barysynda kóbine áleýmettik sala, bilim berý men bala tárbıesi jaıly ózekti suraqtar kóterildi.
«Balalar qaýipsizdigi basty nazarda bolýy kerek. Balalardyń jaǵdaıyn jasaý úshin kúndiz-túni jumys isteıtin ata-analar bar. Biraq olar kóp jaǵdaıda balalaryn qaldyryp ketetin jer taba almaı qınalady. Sondyqtan táýlik boıy jumys isteıtin balabaqshalar ashý kerek. Táýlik boıy jumys isteıtin balabaqshalardy memlekettik balabaqshalardyń negizinde ashyp, jumys ýaqytyn uzartý arqyly iske qosýǵa bolady. Bul sheshimniń birden-bir artyqshylyǵy – másele sheshimi úlken qarajat jumsaýdy qajet etpeıdi», deıdi Q.Ábden.
