Is-shara barysynda Nurlan Áýesbaev jınalǵan qaýymdy óziniń saılaýaldy baǵdarlamasynyń negizgi tarmaqtarymen tanystyrdy. Úmitker óz sózinde Qazaqstandaǵy ekonomıkalyq jaǵdaıdyń kóńil kónshitpeıtinin atap ótti. Inflıasııa men baǵa ósimi, sonymen birge ulttyq valıýta baǵamynyń árkez tómendeýi – qatardaǵy qazaqstandyqtardyń qaltasyna aýyr tııýde. Sol sebepti Nurlan Áýesbaevtyń saılaýaldy baǵdarlamasynyń alǵashqy tarmaǵy saıası reformalarǵa arnalǵan.
JSDP-dan úmitkerdiń pikirinshe, munyń aldyn alý úshin «kúshti Prezıdent – yqpaldy Parlament – esep beretin Úkimet» formýlasynan bas tartýymyz kerek. «Bul formýlada birinshi kezekte kásibı, daǵdarysqa qarsy úkimetti quratyn bir palataly parlament myqty bolýy kerek. Sonymen qatar Májilistiń 50 paıyzy ózderin qoldaǵan halyq aldynda jaýapty bolatyn ózin-ózi usynýshylardan quralýǵa tıis. Sol kezde ǵana biraz dúnıe, onyń ishinde bilim berý salasyndaǵy máseleler sheshile bastaıdy», deıdi ol.
Nurlan Áýesbaevtyń paıymdaýynsha, medısına sekildi bilim berý salasy da memleket tarapynan joǵary deńgeıde qarjylandyrylýǵa tıis.
