Búgin Serikqalı Brekeshev Astananyń ekologııalyq jaǵdaıyn jaqsartý jónindegi is-sharalar men sý resýrstarynyń jaı-kúıi jóninde aıtty.
Jalpy ekologııalyq jaǵdaıdy jaqsartý úshin óńirler bólinisinde ulttyq joba jáne jol kartalary sheńberinde júıeli jumys júrgizilip jatqanyn habarlady.
Elordanyń jeke sektoryn gazdandyrý jalǵasýda. Tabıǵı gazǵa 13 derbes qazandyq qosylǵan.
Qalalyq kóliktiń shyǵaryndylaryn azaıtý maqsatynda elorda ákimdigi bıyl 100 birlik elektr avtobýstaryn satyp alyp paıdalanýǵa berdi, qalanyń kommýnaldyq kásiporyndarynyń avtokólik quraldarynyń 75%-y gaz otynyna aýystyryldy, qalalyq taksı parkin GBQ-ǵa aýystyrý boıynsha jumystar júrgizilgen.
Qaldyqtardy basqarý máseleleri jóninde aıtqanda, ruqsat etilmegen polıgondar máselesi áli de alańdatyp otyrǵanyn habarlady. Bıyl kosmomonıtorıngtiń kómegimen 551 polıgon anyqtalyp, onyń 46%-y ǵana joıylǵan.
«Polıgondardyń ulǵaıý sebebi jańa Ekokodekstiń talaptaryna baılanysty, oǵan sáıkes qoqys shyǵaratyn uıymdardyń tizilimi júrgiziledi jáne qurylys qoqystaryn qala sheginen shyǵarýǵa tyıym salynady. Polıgondardy joıý úshin keste jasaldy. Alaıda polıgondar joıylǵan joq. Elordalyq ekologııa departamentine osy baǵyttaǵy jumysty kúsheıtýdi tapsyramyn», dedi vedomstvo basshysy.
Budan ózge sý resýrstarynyń jaı-kúıi men káriz júıesindegi problemalarǵa toqtaldy.
Sý resýrstarynyń lastanýyn boldyrmaý maqsatynda ákimdikke barlyq abonentterdi ortalyqtandyrylǵan kárizge qosý boıynsha jumysty uıymdastyrý, nóser aǵyndarynyń kollektoryna ruqsatsyz aǵyzýdy boldyrmaý boıynsha baqylaýdy qamtamasyz etý, zańsyz aǵyzý kózderin anyqtaý úshin qalanyń jerasty sý qubyry jelilerine tekserý júrgizý jáne ınjenerlik sý qubyry jelilerin jóndeý men olardy «Astana sý arnasy» MKK tazartý stansııalaryna qosýdy qamtamasyz etý usynyldy.
