Jıynǵa memlekettik organdar, ulttyq kompanııalar men salalyq kásiporyndardyń basshylary qatysqan.
Talqylanǵan máseleler - mashına jasaý salasyn damytýdyń keshendi jospary, Vagon jasaýdy damytý jónindegi jol kartasyn ázirleý jáne áleýmettik úshjaqty áriptestik jónindegi salalyq komıssııanyń jumysynyń tıimdiligin arttyrý.
Premer-Mınıstr salany qoldaý jónindegi bastamalardy maquldady. Ol jergilikti qamtýdy damytýdy naryqtyq quraldar: offteık jáne ofsettik kelisimsharttar esebinen yntalandyrý qajet ekenin aıtty.
Budan basqa, ǵylymı-ónerkásiptik klasterlerdi qurý, mashına jasaý kásiporyndaryn shıkizatpen, qoljetimdi kredıttik resýrstarmen jáne basqa da yntalandyrý sharalarymen qamtamasyz etý máseleleri qaraldy.
Álıhan Smaıylov memlekettik organdarǵa olardy egjeı-tegjeıli pysyqtaýdy tapsyrdy.
«Qazaqstan mashına jasaýshylar odaǵy» ZTB basshysy Meıram Pishembaev, «Qazaqstan Injınırıng» UK» AQ basshysy Temirjan Ábdirahmanov, «Qazenergokabel» AQ basshysy Vladımır Bobrov, «Atyraýmunaımash» JShS basshysy Temirlan Darkembaev, «ZIKSTO» AQ basshysy Renat Shamsýtdınov baıandama jasady.
Keńes qorytyndysy boıynsha Premer-Mınıstr barlyq aıtylǵan máseleler baqylaýǵa alynatynyn atap ótti.
«Biz sizdermen únemi kezdesip turamyz. Ara-tura jańa máseleler týyndap jatady: olardyń keıbiri boıynsha birden sheshim qabyldasaq, basqalary normatıvtik-quqyqtyq ózgeristerdi qajet etedi. Birqatar problemalyq máseleler boıynsha egjeı-tegjeıli zertteý júrgizý qajet. Biz osy máselelerdi ózara birlesip sheshýge tyrysamyz», dedi Álıhan Smaıylov otandyq mashına jasaýshylarǵa qarata aıtqan sózinde.
