Is-sharaǵa memleket jáne qoǵam qaıratkerleri, BAQ basshylary men ókilderi, belgili sheteldik jáne otandyq ǵalymdar, jýrnalıstıka fakýltetiniń professorlary, oqytýshylary men stýdentteri qatysty.
Konferensııa aıasynda ulttyq ıdeologııa, aqparattyq qaýipsizdik, qazir belsendi qoldanysqa engen jańa medıa trenderine qatysty ózekti máseleler qarastyrylyp, jýrnalıstik bilim berýdiń búgingi kelbeti men erteńgi beınesi talqylandy.
Konferensııany ýnıversıtet rektory Janseıit Túımebaev ashty. Ol óz sózinde Qazaqstannyń halyq jazýshysy, memleket jáne qoǵam qaıratkeri Sherhan Murtazanyń sińirgen eńbegin el Prezıdenti Qasym-Jomart Toqaev joǵary baǵalaǵanyn erekshe atap ótti.
Belgili aqyn, Memlekettik syılyqtyń laýreaty Nurlan Orazalın, professor Qanseıit Ábdezuly, Qyrǵyz Respýblıkasy UǴA Sh.Aıtmatov atyndaǵy Til jáne ádebıet ınstıtýtynyń dırektory Abdyljan Aqmatalıev, jazýshy-pýblısıst «Ana tili» gazetiniń bas redaktory Qalı Sársenbaı, Parlament Májilisiniń depýtattary Darhan Myńbaı men Janarbek Áshimjan baıandama jasady. Qonaqtar estelikterimen bólisip, Sherhan Murtazanyń qaıtalanbas tulǵa, uly jazýshy, pýblısıst, teńdesi joq sheber aýdarmashy ekenin atap ótti.
Konferensııa qatysýshylaryna Sherhan Murtazanyń shyǵarmashylyǵy týraly derekti fılm kórsetildi. Sondaı-aq is-shara barysynda Qazaqstan Respýblıkasy Senatynyń Tóraǵasy Máýlen Áshimbaevtyń, Almaty qalasynyń ákimi Erbolat Dosaevtyń quttyqtaý hattary oqyldy. Al Sherhan Murtazanyń bes kitaptan turatyn «Qyzyl jebe» romanyn tárjimalaǵan túrik jazýshysy, ǵalym jáne aýdarmashy Ashýr О́zdemır onlaın formatta quttyqtaý joldady.
Jıyn aıasynda ál-Farabı atyndaǵy QazUÝ-dyń jýrnalıstıka fakýltetinde Sherhan Murtaza atyndaǵy aýdıtorııanyń ashylý saltanaty men tusaýkeseri ótti. Kórnekti memleket qaıratkeri, halyq jazýshysy jáne jýrnalıstiń ómiri men qyzmeti týraly mol maǵlumat beretin zamanaýı tehnologııalarmen jabdyqtalǵan oqý zerthanasy ashyldy.
Jazýshy-jýrnalıstiń ómiri men shyǵarmashylyǵy bolashaq jýrnalısterge úlgi-ónege bolyp, zamanaýı tehnıkamen jabdyqtalǵan oqý zaly shákirtterdiń sheberligin shyńdaýǵa, jazý mashyǵyn qalyptastyrýǵa úlken kómegin tıgizeri sózsiz dep oılaımyz.
Safýra BО́RIBAEVA,
Ál-Farabı atyndaǵy QazUÝ
Jýrnalıstıka jáne kommýnıkasııa jónindegi IýNESKO kafedrasy
