«Mańǵystaýdyń tabıǵaty túıe ósirýge óte qolaıly ekeni belgili. Qazir oblysta 90 myńǵa jýyq túıe bar. Túıe ónimderine búkil elimizde suranys óte joǵary. Odan alynatyn shıkizatty tereń óńdeý jumysyn qolǵa alý qajet. Bul ónimniń túrin kóbeıtedi ári onyń baǵasyna oń yqpal etedi. Bul salaǵa sýbsıdııa berý joldaryn da qarastyrý kerek», dep atap ótti Prezıdent.
Memleket basshysynyń aıtýynsha, Qazaq Adaı jylqysyn qazaqtyń taǵy bir tamasha brendine aınaldyrý qajet.
«Halqymyz úshin jylqynyń orny qashan da erekshe. Qazaq Adaı jylqysyn Mańǵystaýdyń biregeı baılyǵy deýge bolady. Bul arǵymaqtar shólge erekshe shydamdy, alys jolǵa tózimdi ekenin bári biledi. Mańǵystaý tulparlary alysqa shabatyn halyqaralyq marafon jarystarynda árdaıym báıge alyp júr. Jaqynda ótken «Uly dala joryǵynda» oblys shabandozdary jeke-dara ozyp keldi. Qazaq Adaı jylqysyn álemge tanyta alsaq, bul bizdiń taǵy bir tamasha brendimizge aınalady. Sondyqtan Úkimetke ony ǵylymı túrde asyl tuqymdy mal retinde taný jáne kóbeıtý úshin tıisti jumystardy jedel qolǵa alýdy tapsyramyn», dedi Qasym-Jomart Toqaev.
