Qazaqstandyq oqýshylar men ata-analar mektep ájethanalary, jýynatyn bólmelerdegi problemalar men ashanasyndaǵy buzýshylyqtar týraly Oqý-aǵartý mınıstrligine habarlaı alady. Aıta keterligi, avtorlardyń anonımdiligine kepildik berilip, olar týraly aqparat jarııa etilmeıdi. Mektep ájethanalary men ashanalaryndaǵy kemshilikter týraly foto jáne vıdeony 8 700 699 04 46 nómiri arqyly WhatsApp jáne Telegram-BOT-qa, Instagram jelisindegi @balaga.laiyq paraqshasyn belgileý arqyly jiberýge bolady.
Sondaı-aq Oqý-aǵartý mınıstrligi Balalardyń quqyqtaryn qorǵaý komıtetiniń bastamasymen «Balaǵa laıyq» aksııasy ótip jatqanyn aıtty. Aksııa «Mekteptiń jaqsarýyna kómektes!» uranymen osy jyldyń 20 jeltoqsanyna deıin jalǵasady.
«Aksııaǵa kez kelgen oqýshylar, eriktiler, balalar ókildigi, muǵalimder, ata-analar, úkimettik emes uıymdardyń ókilderi jáne t.b. qatysa alady. «Balaǵa laıyq» aksııasynyń nátıjesinde mekteptegi jýynatyn bólmeler men ashanalardyń jaǵdaıy aıtarlyqtaı jaqsarǵanyn aıta ketken jón. Zań buzýshylyqtar anyqtalǵan 100-den astam mektepte jóndeý jumystary júrgizilip, kemshilikter joıyldy. Mysaly, Pavlodar qalasyndaǵy №5 orta mekteptiń ájethanasyndaǵy kabınalar ata-analardyń mınıstrlik ókilderine bergen ótinishinen keıin qalypqa keltirildi. Soltústik Qazaqstan oblysy Aryqbalyq aýylynyń mektebinde sý qubyrlary aýystyrylyp, jóndeý jumystary júrgizildi. Oral ınnovasııalyq lıseıi ashanasynyń jumysyna qatysty túsken ótinishten keıin mektepte ashanaǵa dezınfeksııa júrgizilip, oqýshylardy tamaqtandyrý sapasy jaqsartyldy. Mekteptegi ájethanalar men ashanalarǵa monıtorıng jazalaý úshin emes, balalarǵa qajetti jaǵdaı jasaýǵa mektepterdi birlese tartý úshin júrgizilip jatqanyn atap ótkim keledi», dedi QR Oqý-aǵartý mınıstrligi Balalardyń quqyqtaryn qorǵaý komıtetiniń tóraǵasy Nasymjan Ospanova.
Aksııa kezinde mektepterdiń jýynatyn bólmeleri men ashanalarynyń jaǵdaıy týraly barlyǵy 1 000-nan astam shaǵym túsken. Eń belsendiler Astana men Almaty qalalarynyń jáne Almaty, Aqmola jáne Qyzylorda oblystarynyń oqýshylary men ata-analary eken.
Oqý-aǵartý mınıstrliginiń aıtýynsha, árbir ótinishti oblystyq bilim basqarmasy qaraıdy, al usaq-túıek kemshilikterdi mektepterdiń ózi anyqtap, joıýy kerek.
