Kandıdat óziniń saılaýaldy baǵdarlamasyn tanystyrý barysynda áleýmettik áriptestik ınstıtýtyn damytýdyń, táýelsiz kásipodaqtar mártebesin kóterýdiń, ekonomıka men eńbekaqy tóleý júıesin reformalaýdyń mańyzdylyǵyn atap ótti.
Aıta keteıik, búginde kásiporynda 500-den astam adam jumys isteıdi, olardyń 90 paıyzy – kásipodaq múshesi. Osyǵan baılanysty kandıdat eńbekshilerdiń múddelerin qorǵaıtyn uıymdardyń mártebesin kóterýge basa nazar aýdardy.
«Bárimiz joǵary tabys alǵymyz keledi. Bul biz úshin kiris bolsa, jumys berýshi úshin shyǵyn. Sondyqtan jalaqy mólsheriniń qandaı bolýy kerektigin, ony qalaı kóbeıtýge bolatynyn talqylaý qajet. Bul máseleni salalyq deńgeıde sheshken jón. Ol úshin qyzmetkerler óz quqyqtaryn qorǵaý maqsatynda kásipkerlermen jáne jumys berýshilermen birlesip eńbekaqy tóleý júıesin ázirleıtin salalyq kásipodaqtarǵa senim artýǵa tıis», dedi M.Qajyken.
Kandıdat «kásipodaqtar arasynan usynyldym, demek barlyq jumysshy kótergen máselelerdi sheshý jaýapkershiligi júktelgen» dedi. Úmitker sapaly jáne qoljetimdi bilim berýdi, densaýlyq saqtaý salasyn qarjylandyrýdy jáne áleýmettik jaǵdaıy tómen otbasylarǵa turǵyn úı berýdi qoldaıtynyn aıtty.
