Nura aýyly – Almaty qalasynan 42 shaqyrym jerde ornalasqan eldi meken. Aýyldaǵy basty másele – jumyssyzdyq. Turǵyndardyń basym bóligi kún saıyn Almaty qalasyna qatynap jumys isteıdi. Qala irgesindegi aýyl sanalatyndyqtan oqý oryndary stýdentterge jataqhanadan oryn bermeı, jastar kún saıyn qalaǵa baryp-kelip oqýǵa májbúr.
Alaıda aýyl men Almaty arasynda avtobýstyń júrmegenine tórt jyldaı ýaqyt bolǵan. Bul máseleni sheshýge bılik qulyq tanytpaǵan. «Avtomobıl kóligi týraly» zań boıynsha qala mańyndaǵy elý shaqyrymǵa deıingi eldi meken qalalyq qoǵamdyq kólikpen qamtamasyz etilýi kerek bolsa da, sot sheshimi shyqsa da, másele oryndalar emes. Almaty qalasynyń ákimdigi sot sheshimin oryndaýdyń ornyna qarsy shaǵym jazyp álek. Atalǵan aýylda sý, jaryq, densaýlyq saqtaý, bilim berý máseleleri de ózekti.
«Almaty men Nura aýyly arasyndaǵy avtobýs qatynasynyń máselesine «Aýyl» partııasy aralasyp, sotta aýyl turǵyndarynyń paıdasyna sheshim shyǵarylǵanyn bilesizder. Desek te qoǵamdyq kólik máselesi áli de sheshilgen joq. Álemdik qaýymdastyq memleket mártebesin megapolıstermen emes, alystaǵy aýyldyń ahýalymen ólsheıdi», dedi Jıgýlı Daırabaev.
