«Bıyl 15 eldi-mekenniń elektr jelisi jóndelip jatyr. Degenmen, bul jetkiliksiz. Sońǵy jyldary aımaqta elektr qýaty júıesi durys istemeıtin boldy. О́ńirdegi energııa tapshylyǵy – shamamen 200 megavatt. Oblysta óziniń elektr stansııasyn paıdalanyp otyrǵan kásiporyndar bar. Biraq, olardyń múmkindigi sheksiz emes», dedi Qasym-Jomart Toqaev.
Prezıdent ónerkásip oryndary damyp, halyq sany kóbeıgen saıyn qýat kózine degen suranys artatynyn aıtty. Sondaı-aq, Atyraý oblysynyń elektr energııasy júıesine túgel jańǵyrtý jumystaryn júrgizý kerektigin aıtty.
«Men byltyr batys aımaǵyn elimizdiń negizgi energetıka júıesine qosý týraly tapsyrma berdim. Úkimet osy máseleni pysyqtap, naqty sheshim qabyldasyn. Sondaı-aq elektr jelilerin jóndeý jumystaryn respýblıkalyq bıýdjetten qarjylandyrý múmkindigin qarastyrý qajet», dedi Memleket basshysy.
Budan bólek, Prezıdent «Atyraý Jaryq» kompanııasynyń jumysyna qatysty syn-eskertýler bar ekenin aıtty. Eger kompanııa óz mindettemesin oryndamasa, ondaı kelisimdi buzý kerek dep túıindedi.
