Kandıdattyń saılaýaldy úgit-nasıhat jumystaryn júrgizý úshin bul aımaqta 100-den astam adam jumyldyrylǵan.
«Búgin Qyzylordadaǵy shtabtyń jumysymen tanystym. Qyzylorda oblysy – elimizdegi eń iri aımaqtardyń biri. Jergilikti shtabta 10 qyzmetker, 100 volonter jumys isteıdi. Shtab ókilderi aýdan jáne aýyl turǵyndarymen de kezdesý ótkizedi. Jumys úılesimdi ári talaptarǵa saı iske asyrylyp keledi», dedi Qaraqat Ábden.
Shtab ókilderi málimdegendeı, saılaýshylar tarapynan joldanǵan saýaldar men usynystarǵa basa mán beriledi. «Jergilikti turǵyndar kóbinese áleýmettik taqyryptarǵa qatysty saýal joldaıdy, turǵyndarmen keri baılanys jaqsy damyǵan. Jalpy alǵanda, saılaýshylar Q.Ábdenniń áleýmettik baǵdary basym baǵdarlamasyn qoldaıdy», dedi óńirlik shtab jetekshisi Marjan Bısenova.
Shtabtyń úgit-nasıhat jumysy ártúrli sanattaǵy azamattardy qamtıdy. Múmkindigi shekteýli jandar da nazardan tys qalyp jatqan joq. Ol úshin shtab músheleri saılaýshylardyń úılerin aralap, úmitker baǵdarlamasynyń negizgi baǵyttary jaıly málimet berip júr.
Eske salsaq, Q.Ábden el aımaqtaryn aralap, 11 qala men birneshe aýyldyq eldi mekende 20-dan astam kezdesý ótkizdi. Aldaǵy ýaqytta úmitker Soltústik Qazaqstan, Túrkistan, Jambyl oblystaryna baryp, saılaýshylarmen kezdesý ótkizedi.
