Ýıtnı men Dımash

Elge qaıtqan soń, onyń ánderin taýyp, ómir­baıany­men jaqyn tanystym. Aǵylshyn tilin­degi árbir mýzykalyq shyǵarmasy óner­súıer jurt­tyń qulaǵynyń quryshyn qandyryp, áldeqashan álem sahnasyn moıyndatyp úlgergen tulǵany kesh te bolsa bilgenime qýandym. О́nerin baǵala­masa, tamsanbasa, órkenıetti qoǵamnyń tyńdar­many oǵan jaıdan-jaı «Daýys» degen laqap at qoımaıdy ǵoı. Onyń án taspalary kúni búginge deıin jer júzindegi eń kóp satylymǵa ıe boldy. Naqtyraq aıtsaq, búkil álem boıynsha 200 mıllıonnan astam úntaspasy satylyp, rekord jasady. Sondyqtan onyń ózgeshe talanty men án sahnasyndaǵy talǵamy osy saladaǵy kópte­gen ánshige áser etti. Onyń taǵy bir daralyǵy, vokaldyq mýzykany ımprovızasııalaýdaǵy kúshti qýaty edi. Áli kúnge onyń bul ereksheligin eshbir mýzyka maıtalmany qaıtalaı alǵan joq. Hıýston fılmge túskennen keıin onyń tanymaldyǵy úsh ese artty. Adal eńbegimen óner salasynda eki ret Emmı syılyǵyn, alty márte Gremmı syılyǵyn, on alty ret Billboard mýzykalyq marapatyn jeńip aldy.

Onyń úlken ónerge degen talpynysy sonaý bala kezinde shirkeýde án aıtyp júrgende bastalǵan. 1981 jyly ol jasóspirim model bolyp kózge túsken soń, kóp ótpeı onyń sýreti Seventeen jýrna­lynyń muqabasyna basyldy, bul tarıhtaǵy alǵashqy qara násildi áıeldiń atalǵan jýrnaldyń bas betine shyǵýy edi. Ánshiniń taǵdyryn ózgertken oqıǵalar bir bul emes, onyń alǵashqy eki án albomy Billboard 200 tiziminde birinshi orynǵa ıe boldy ári sol ornyn saqtap qaldy.

Hıýston óziniń akterlik darynyn «Oqqaǵar» fılmimen bastady. Atalǵan fılm osyǵan deıin eń kóp tabys tapqan fılmniń biri retinde kıno tarıhynda altyn árippen jazyldy. О́zi ról oınaǵan fılmniń saýndtregi bolǵan «Men seni árqashan súıemin» áni jyl rekordy úshin Gremmı syılyǵyn jeńip aldy.

 Ánniń de estisi bar ekenin bul qoǵam baıaǵyda-aq sezindi, túsindi. Jyltyraqqa qumar toptyń tyńdaıtyny sol baıaǵy qýatsyz, kúısiz, nársiz mýzyka. Al Hıýston aıtqan ánderdiń tyńdaý úshin de adamǵa oı kózi kerek, kóńilge altyn sáýle kerek. Onyń aıtqan ánderi quddy onyń mártebesi sııaqty záý bıikten túsken joq. Meıli onyń júrekjardy ánderin kólikte, ásem tabıǵat aıasynda, tipti jalǵyz qalǵanda tyńdasańyz da sizge syılar lázzaty bireý ǵana, ol – ómirge qushtarlyq.

Qaıbir jyly Dımash kóptiń kóńilinen oryn alyp, ánderin sheteldikter qulaı tyń­dap jatqanda, mártebemiz bıiktep, qýanyp júrdik. Onyń ónerine baǵa bergen sheteldik sarap­shy­nyń biri «Dımashtyń daýysymen soǵysty toqta­týǵa bolady», dedi. Án sholpandaryna bundaı bıik baǵa eshqashan aıtylǵan joq, aıtylsa da Maıkl Djeksonǵa ǵana aıtylǵan shyǵar.

Dımash meıli halyq ánderin, meıli avtorlyq ánderdi oryndasyn, bári onyń daýysymen birge zeńgir kókke aq qanat kógershindeı qalyqtap ala jóneledi. Zataevıch kezinde «Endi on jylda qazaq ánshisi patshanyń aldynda án salady» degendi tekke aıtpasa kerek, daralyq pen danalyqty taý men shyń quzdardan úırengen keń halyqtyń óneri men mádenıeti kelesi ǵasyrlarda da órken jaıaryn ańdaǵan da shyǵar. Bizdiń Dımash patshanyń da, alpaýyt elderdiń prezıdentteriniń de aldynda qazaq únin samǵatty. Osyndaıda qazaqtyń «Astynan alty qyrdyń úni estilip» degen keremet teńeýin oıǵa alasyz. Onyń daýysyndaǵy náziktik pen ónerindegi tazalyq ony keshegi Hıýstondar jetken bıik sahnalarǵa jeteledi, áli de jeteleı bermek.