Úkimet basshysynyń aıtýynsha, etnıkalyq qazaqtarǵa, kámeletke tolmaǵandarǵa, jaqyn týystary Qazaqstanda turatyn sheteldikterge, jubaıy qazaq nemese shetelde turatyn qazaqtarǵa, Qazaqstan aldynda erekshe eńbegi elengen azamattarǵa qazaq tilin bilý talap etilmeıdi.
Qalǵandardyń barlyǵy Qazaqstan azamaty bolý úshin qazaq tilin bilýi kerek. Smaıylovtyń aıtýynsha, bul azamattyq alǵan adamdardyń qoǵamǵa tez beıimdelýine múmkindik beredi.
«Sondyqtan mundaı emtıhan tapsyrý kerek dep esepteımiz. Bul normalar qazir Úkimetpen kelisý satysynda. Jaqyn arada zań jobasy Parlamentke joldanady. Jalpy biz bul normalardy qoldaımyz jáne olardy zańnamaǵa engizý qajet dep esepteımiz. Mundaı joba halyqaralyq tájirıbede bar. Kóptegen elderde azamattyq alý úshin memlekettik til men tarıhty bilý, sondaı-aq tıisti emtıhan tapsyrý qajet. Mysaly, Germanııada, Túrkııada, Kanadada, Reseı Federasııasynda osyndaı talaptar bar. Sondaı-aq qylmys jasaǵan adamdar azamattyq alýǵa ótinish bere almaıtynyn atap ótkim keledi», dedi Premer-Mınıstr Senat otyrysynda.
