Memleket basshysyna «Qańtar oqıǵasy» boıynsha júrgizilip jatqan tergeý amaldary men oǵan qatysqandarǵa raqymshylyq jasaý máseleleri prokýratýranyń erekshe baqylaýynda turǵany aıtyldy.
Qasym-Jomart Toqaevqa qylmystyq salada 1,8 myńnan astam tulǵanyń konstıtýsııalyq quqyǵy qorǵalǵany jóninde aıtyldy. Prokýrorlardyń narazylyǵy boıynsha 866 úkim joıylyp, ózgertildi. 183 sottalýshynyń jaǵdaıy jaqsartyldy, 20 adam aqtaldy. Bıznesti qorǵaý salasynda 145 myń kásipkerdiń quqyǵy qalpyna keltirildi.
Berik Asylovtyń aıtýynsha, jer qoınaýyn paıdalaný men avtomobıl joldary salalarynda júıeli zań buzý faktileri anyqtaldy. Indýstrııa mınıstrligi ken óndirýge daıyn turǵan 144 ken ornyn barlaýǵa kelisimsharttar bergen. Budan bólek, jer qoınaýyn paıdalanýshylar bıýdjetke mindetti 96 mıllıard teńge tólemegeni anyqtaldy.
Ekonomıkalyq resýrstardy zańsyz shoǵyrlandyrýǵa qarsy is-qımyl máseleleri jónindegi komıssııa jumysynyń aıasynda memleketke jyljymaıtyn múlik obektileri, jer ýchaskeleri jáne basqa da múlik qaıtaryldy.
Prokýrorlardyń aktilerine sáıkes, quny 43 mıllıard teńgeni quraıtyn zańsyz berilgen jáne maqsatyna paıdalanylmaǵan 7,3 mıllıon gektar jer memleketke qaıtaryldy. Sonyń ishinde, olıgopolııa menshigindegi quny 6 mıllıard teńge bolatyn 140 myń gektar jer qaıtaryldy. Jýyq arada olıgopolııa sýbektileriniń menshiginde bolǵan 160 myń gektar jer qaıtarylady.
