Zaýyt basshylarynyń aıtýynsha, dánekerleý sehy ázirshe «Lovol» traktorlarynyń kabınalaryn jasap shyǵarady.
– Biz bul jobany júzege asyrý úshin byltyr qys boıy daıyndyq júrgizdik. О́ndiris alańyn daıyndap, ony qajetti qurylǵylarmen jabdyqtaýdyń ózine kóp ýaqyt shyǵyndadyq. Onyń syrtynda, jańa jelide jumys isteıtin mamandardy shetelge oqýǵa jiberip, kásibı biliktiligin arttyrý, tájirıbe ushtaý kýrstaryn uıymdastyrdyq. Nátıjesinde, qazir dánekerleý sehy toqtaýsyz jumys istep tur. Táýligine 10 kabına shyǵarady, – deıdi kásiporynnyń tehnıkalyq damý jónindegi dırektory Vladımır Volovodenko.
«AgromashHoldıng KZ» AQ aýmaǵyndaǵy aýylsharýashylyq tehnıkalary óndirisiniń otandyq úlesin arttyrýǵa baǵyttalǵan lokalızasııalyq ortalyqta metaldy lazermen kesý, ııý, maıystyrý, syrlaý jáne dánekerleý oryndary men kabınalardyń plastık bólshekterin, dán sebetin tehnıkalar men olarǵa qajet qosalqy bólshekterdi jasaıtyn, sondaı-aq toraptar men termoshý oqshaýlaǵyshtardy shyǵaratyn qurastyrý konveıerleri men avtomattandyrylǵan jeliler ornatylǵan. Zaýyt bul qurylǵylardyń bárin «О́nerkásipti damytý qory» AQ-nyń qarjylaı qoldaýymen satyp alyp otyr. Lokalızasııalyq ortalyqtyń aldaǵy maqsaty – aýylsharýashylyq tehnıkalaryna arnalǵan qosalqy bólshekter óndirisin ulǵaıtyp, «Kıroves», «Essil», «Lovol», «Pottinger» brendterine qajet bólshekterdi shyǵarýǵa kóshý.
Lokalızasııalyq ortalyqtyń keńse ǵımarattary, zamanaýı qurylǵylarmen jabdyqtalǵan ámbebap sehtary, sonymen qatar arnaıy oqý ortalyǵy, 100 oryndyq jaıly jataqhanasy bar. Zaýyt basshylarynyń aıtýynsha, munyń bári jumysshylarǵa qolaıly jaǵdaı týǵyzyp, otandyq óndiristi jańa deńgeıge kóterýge múmkindik beredi.
Lokalızasııalyq ortalyq, birinshiden, tutynýshylardyń arzan ári joǵary sapaly ónimdi satyp alýyna múmkindik beredi, ekinshiden, kásiporyn jumysshylarynyń qolaıly jaǵdaıda eńbek etýine qol jetkizedi. Mamandar keshendi joba aldaǵy ýaqytta ımport kóleminiń edáýir kemı túsýine yqpal ete bastaıdy degen pikirde.
Lokalızasııalyq ortalyqtaǵy óndiristik jobalar qazirdiń ózinde Pöttinger, Deutz-Fahr, PKF Luidor sekildi álemge tanymal kompanııalarmen jáne Qostanaı traktor zaýytymen birlese otyryp júzege asyrylýda. Birlesken joba jergilikti ónim sanalatyn «Lovol traktorlary» men «Essil» kombaındarynyń otandyq úlesin arttyrýǵa múmkindik berip otyr.
– Eshqashan tek iri torapty qurastyrýmen ǵana aınalysamyz degen maqsat qoıǵan emespiz. Osyǵan oraı, biz birinshiden, óndiris aýqymyn keńeıtý kerektigin, ekinshiden, lokalızasııany tereńdetý qajettigin túsindik. Lokalızasııalyq ortalyqtyń ashylýy bizdiń kásiporynnyń qyzmet kórsetý aıasyn birneshe ese keńeıtedi. Biz jańa joba jasaý arqyly aýylsharýashylyq tehnıkasynyń otandyq óndirisin túbegeıli ózgertetin jarqyn keleshekke qadam bastyq, – deıdi «AgromashHoldıng KZ» AQ prezıdenti Dınara Shýkıjanova.
Zaýyttyń kommersııalyq dırektory Nıkolaı Parhomenkonyń aıtýynsha, jergilikti aýylsharýashylyq taýarlaryn óndirýshiler tarapynan otandyq tehnıkaǵa degen suranys jyl sanap artyp keledi.
– Suranystyń joǵary bolýynyń basty sebebi – biz ózimiz shyǵaryp jatqan traktor-kombaındardyń tehnıkalyq múmkindikterin jetildirip, modernızasııalaýǵa basa kóńil bóle bastadyq. Búginde bizdiń ónimder sapasy jaǵynan sheteldik tehnıkalarǵa báseke bola alatyn jaǵdaıǵa jetip qaldy. Munyń syrtynda, qostanaılyq tehnıka men osynda óndirilip jatqan qosalqy bólshekter ımportty tehnıka men shetelden keletin qosalqy bólshekterge qaraǵanda 2-2,5 ese arzan, – dedi N.Parhomenko.
Naryqta joǵary suranysqa ıe «Essil» kombaıny men «Lovol» traktorlaryn bylaı qoıǵanda, búginde sharýashylyqtardyń kóbi Qostanaı zaýytynan endi ǵana shyǵa bastaǵan «Deutz-Fahr» markaly jańa traktorlar men kombaındarǵa qyzyǵýshylyq tanytyp otyr. Byltyrdan beri «AgromashHoldıng KZ» AQ men «SDF Group» kompanııasy birlesip iske asyra bastaǵan ilkimdi jobanyń aıasynda bıyl aýylsharýashylyq tehnıkalaryn qurastyratyn Qostanaı zaýyty 68 «Deutz-Fahr» traktory men osy saýda belgisindegi 14 kombaın jasap shyǵarǵan.
Qostanaı oblysy
