О́ndiristi ólkedegi tyń bastama

Jaqynda Indýstrııa­lan­dyrý kartasy aıasynda «QazPromBezopasnost-PV» JShS joǵary qysymdy ydystar, jylý almasý apparattary men metall quras­tyr­ma­laryn shyǵaratyn jańa ınves­tısııalyq jobany iske qos­ty. Sonyń nátıjesinde serik­testikte qosymsha 15 ju­mys or­ny ashyldy. О́ndiris basshysy Erjan Hamzınniń aıtýynsha, jańa jobalarǵa jalpy somasy 200 mln teńge jeke ınvestısııa tartylǵan.

– Bizdiń kásipornymyz jańa­dan qurylyp jatyr. Qazirgi kúni aýamen salqyndatqysh, jylý almastyrǵysh apparattaryn, F-sılındrli buıymdaryn, jelilik jylytqyshtardy, arnaıy ydystar men túrli aýqym­daǵy metall qurastyrmalaryn ázirleımiz. Tek qana metall qurastyrmalar boıynsha jylyna 500 tonna buıymdar jasap shyǵýǵa múmkindigimiz bar, – deıdi kásiporyn dırektory.

Jazda oblys ortalyǵynda munaı-hımııa ónimderin ázir­leıtin tolyq sıkldi kásiporyn jumysqa kiriskeni de málim. Eksportqa baǵyttalǵan óndiris orny jyl saıyn 30 myń tonna reagentter men qospalar jasap shyǵarýǵa múmkindik beredi. Osylaısha, «Qazmunaıhım» JShS Qazaqstanda munaı-hımııa ónimderin tolyq sıkl­men óndiretin alǵashqy kásip­oryn atanyp otyr. Otandyq munaı óndirýshi jáne munaı óńdeýshi kásiporyndaryn 60%-ǵa qamtamasyz etip, TMD, Eýro­palyq odaq, Taıaý Shyǵys jáne AQSh elderine jetkizedi. Kásip­orynnyń dırektory Alen Kenjebaev jalpy joba úsh kezeń boıynsha júzege asyrylaty­nyn aıtady. Investısııalar­d­yń jalpy kólemi – 1 mlrd teń­ge. Qazirgi kezdiń ózinde mun­da 40 turaqty jumys oryndary qurylǵan. Jyldyń sońyna taman kúrdeli munaı-hımııa ónimderin daıyndaýǵa múmkin­dik beretin joǵary temperatýraly sıntez qondyrǵysy­nyń qurylysyn bastaý josparlanyp otyr. Jalpy, Pavlodar oblysynda júzege asyry­lyp jatqan bul tehnologııa­lyq úderis zamanaýı álemdik eko­no­mıka jaǵdaıyndaǵy naryqtyń suranysyna ja­ýap beredi. Kásiporyn memleket, bıznes jáne ǵylymnyń ózara árekettestigin is júzinde dá­lel­dep otyr.

«Steklomır» seriktestiginde ómirsheń etilgen tabaq shyny, ıaǵnı birneshe qabatty terezeler daıyndaıtyn joba da óziniń ereksheligimen tanylyp otyr. Jylyna 120 myń sharshy metr tereze shynysyn shyǵarýǵa qabiletti kásiporyn jańa jobaǵa 3 mlrd teńge ınvestısııa quıǵan. Jańa sehta jańadan 15 jumys orny qu­rylyp, kásiporynnyń ónim ón­dirý kórsetkishteri arta tústi. Tek bir aýysymda mundaǵy ju­mys­kerler 7 myń sharshy metr tereze daıyndaıdy. Kásip­oryn­nyń buıymdary óz eli­miz­ben qatar, О́zbekstan, Tájik­stan, Qyrǵyzstan, Reseı mem­le­ket­teriniń naryǵyna shy­ǵarylady.

Jalpy, «Steklomır» JShS «Bıznestiń jol kartasy-2025» aıasynda 2 mlrd teńgeden astam paıyzdyq mólsherlemeni sýbsıdııalaý túrinde memlekettik qoldaýǵa ıe bolǵan. Byltyr «Qarapaıym zattar ekonomıkasy» baǵdarlamasy aıasynda kásiporynnyń 3,7 mlrd teńge somaǵa kredıttik portfel jobasy qarjylandyryldy. Kásiporynnyń eńbek ujymy jyl saıyn ósip keledi. Eki jyl bu­ryn munda  270 adam jumys is­tese, qazir 468 qyzmetker eń­bek etedi. Zaýyt dırektory Vla­dı­mır Vysoskıı bilikti jumys­shylar jetispeıtinin jetkizdi.

Al óńirdegi munaı-hımııa salasyndaǵy iri kásiporyn­dardyń biri «Kompanııa Nef­tehım LTD» JShS aldaǵy jel­toqsan aıynda ekpoksıdti qosylys (kompaýnd) sehyn ashýdy josparlap otyr. Jylyna 10 myń tonna ónim óndiredi dep bol­janǵan jańa óndiriske 1,5 mlrd teńge ınvestısııa quıyl­ǵan. Munda qosymsha 37 jumys orny paıda bolyp, bıýdjetke jańa kiris kózderi ashylady.

Pavlodar oblysy ákimi baspasóz qyzmetiniń deregine súıensek, aımaqta jyl basynan jalpy somasy 44,5 mlrd teńgeni quraıtyn 70-ke jýyq ınvestısııalyq joba júzege asyrylyp jatyr.

Pavlodar oblysy