Qazaqstanda bir oqýshyǵa shamamen 400 myńnan 1,2 mıllıon teńgege deıin qarjy bólinedi. Bul týraly máslıhat otyrysynda Astana qalasy bilim basqarmasynyń basshysy Qasymhan Senǵazıev aıtty.
«Bizdegi oqýshylarǵa 400-450 myń teńge qarjylandyrylsa, ınklıýzıvti bilim beretin arnaıy mekemeniń oqýshylaryna jylyna 1-1,2 mıllıon teńgege deıin qarjy jumsalady», dedi Q.Senǵazıev.
Onyń aıtýynsha, Astanadaǵy mektep tamaǵynyń baǵasy bir balaǵa kúnine 449 teńgeni quraıdy. Bul eldegi eń tómen baǵalardyń biri. Sondaı-aq mundaı baǵa Almaty, Atyraý jáne Pavlodar qalalarynda saqtalǵan. Basqa óńirlerde bir balany tamaqtandyrýǵa kúnine 800 teńgeden astam qarjy bólinedi.
«Aspazdar qaýymdastyǵymen, Taǵamtaný ınstıtýtymen sóılestik, olardyń barlyǵy bizdiń qazirgi mázirdi qarap, onyń barlyq normalar men standarttarǵa sáıkes keletinin aıtty. Biraq ózimiz qalaǵan nárseni isteý úshin biz shyǵyndardy kóterýimiz kerek. Qoldanystaǵy baǵamen jańa as máziri biz qalaǵandaı bolmaıdy», dedi ol.
Sondaı-aq jyl sońyna deıin bul baǵa 10 paıyzǵa, 2023 jyly 20 paıyzǵa kóteriledi. Al kelesi jyly halyqtyń áljýaz toptaryndaǵy oqýshylardy tamaqtandyrýǵa 12,1 mlrd teńge bólinedi.
