Qorǵanys vedomstvosynyń bir top ofıserleri Qorǵanys mınıstriniń orynbasary general-leıtenant Sultan Kamaletdınovtyń basshylyǵymen Almaty, Jambyl jáne Jetisý oblystarynda ornalasqan quramalar men áskerı bólimderde boldy.
Gvardeısk, Jetigen, Qonaev, Lýgovoı, Taraz jáne Saryózek garnızondarynda Qorǵanys mınıstriniń orynbasary áskerı qyzmetshilermen, azamattyq personalmen jáne olardyń otbasy múshelerimen kezdesti. Ol Prezıdenttiń «Ádiletti memleket, Birtutas ult. Berekeli qoǵam» Joldaýynyń negizgi baǵyttary aıasynda eldiń odan ári damý kókjıegi týraly aıtty.
Jumys tobynyń ókilderi áskerı qyzmetshilerdi zeınetaqymen, turǵyn úımen jáne medısınalyq qamtamasyz etýdi retteıtin zańnamanyń erekshelikterin, Qarýly kúshterdiń jeke quramyn áleýmettik qamtamasyz etýdi jetildirý jónindegi qorǵanys vedomstvosynyń qabyldaǵan sharalaryn túsindirdi.
– Otan qorǵaýshylar ózderin qyzmetke tolyǵymen arnaýy úshin memleket barlyq qajetti jaǵdaıdy jasap jatyr. El qaýipsizdigin qamtamasyz ete otyryp, biz mıllıondaǵan azamattarymyzǵa beıbit aspan astynda ómir súrýge, eńbek etýge jáne balalardy tárbıeleýge, ádiletti Qazaqstan qurýǵa múmkindik beremiz, - dedi kezdesý barysynda general-leıtenant Sultan Kamaletdınov.
Qorǵanys mınıstrliginiń ókilderi garnızon turǵyndarynyń kókeıinde júrgen suraqtarǵa jaýap berdi. Sondaı-aq jabyq jáne oqshaýlanǵan áskerı qalashyqtarda turatyn áskerı qyzmetshiler jáne buryn qyzmette bolǵandarǵa qatysty ózge de máseleler túsindirildi.
