Tártip saqshylary sońǵy táýliktegi jaǵdaıǵa monıtorıng júrgizgen.
«16 qarasha saǵat 08:00-den 17 qarasha saǵat 08:00-ge deıin Almatyda 136 jol-kólik oqıǵasy tirkelgen. Onyń ishinde 26 jol apatynda zardap shekkender tirkelgen. Adam shyǵyny joq», dep habarlady Almaty qalalyq polısııa qyzmeti basqarmasynyń kezekshi bólimi.
Osyǵan baılanysty polıseıler almatylyqtarǵa úndeý jasap, júrgizýshilerge qaýipsizdik sharalaryn kúsheıtýge shaqyrdy.
«Bul úndeý qaýipti qozǵalys quralyn basqaratyn qala júrgizýshilerine arnalǵan. Biz olardy jol qozǵalysy erejelerin qatań saqtaýǵa, júrgizýshi mádenıetin tanytyp, zeıindiligin arttyrýǵa shaqyramyz. Bul úndeý qazir óte ózekti jáne qala joldarynda qaıǵyly oqıǵalardy boldyrmaýǵa septigin tıgizedi», dedi Almaty qalalyq Jergilikti polısııa qyzmeti basqarmasynyń bastyǵy Erjan Uzabaev.
Sondaı-aq ol kóliktegi jazǵy dóńgelekti qysqysyna aýystyrýdy usyndy.
«Sonymen qatar aýa raıynyń nasharlaýyna jáne qar jaýǵanyna, aýa temperatýrasynyń mınýs deńgeıge deıin tómendeýine baılanysty, jol qaýipsizdigin qamtamasyz etý maqsatynda júrgizýshiler men kólik ıelerine kólik dóńgelekterin qysqy mezgilge arnalǵan dóńgelekterge aýystyrýlaryn usynamyz», dedi Uzabaev.
