Ertistiń ústinen jańa kópir salynady

Ertis – elimizdegi eń uzyn ózen. Pav­lodar qalasyn ózge óńirlermen baılanystyrýǵa arnalǵan eki birdeı avto­mobıl kópiri atalǵan sý aıdynynyń ústinen ótedi. Onyń alǵashqysy 1962 jyly salynǵan, áli kúnge qoldanysta. Al ekinshisi «Astana – О́skemen» avtojol qurylysy aıasynda 2016 jyly jańadan turǵyzyldy. Alǵashqy kópir búginde ábden tozyp, shyqpa janym, shyqpanyń kúıin keship turǵany ras. Odan tek jeńil kólikter men qala mańyna qatynaıtyn jolaýshylar avtobýstary ǵana júredi. Úlken júk kólikteriniń barlyǵy oblys ortalyǵyna kirip-shyǵý úshin jańa kópirdi paıdalanady.

Bıyl qazan aıynyń basynda Memleket basshysy Qasym-Jomart Toqaev Kerekýge kelgende jurtshylyqty jyldar boıy alańdatqan bul máselege núkte qoıylatynyn aıtqan edi.

– Pavlodardyń orasan zor tran­zıt­tik áleýeti bar. Biraq Ertis­ten ótetin eski kópir kólik-logıstıka salasyn damytýǵa múm­kin­dik bermeı otyr. Onyń apatty jaǵdaıda turǵanyna biraz jyl boldy. Kópir arqyly júk kólikteriniń júrýine tyıym salynǵan. Buǵan deıin oblys ortalyǵyn aınalyp ótetin jańa kópir salý jos­parlanǵan. Úkimetke kelesi jyly osy jobany bastaýdy tapsyramyn. Joldy kútip ustaýǵa basa nazar aýdarý qajet, – degen edi Prezıdent.

Prezıdent júktegen tapsyr­manyń nátıjesi kóp kúttirgen joq. Osydan birer kún buryn Indýstrııa jáne ınfraqurylymdyq damý mı­nıstrligi jańa kópirdiń qury­lysy kelesi jyly bastalady dep súıinshiledi. Jalpy uzyndyǵy 2,7 shaqyrym, tórt jolaqtan turatyn jańa strategııalyq nysan eski kó­pirdiń janynan salynatyny bel­gili boldy. Onyń qurylysyna el bıýdjetinen 40,3 mlrd teńge bólinbek. Qurylys jumystary 2023 jyly bastalyp, shamamen 3,5-4 jylǵa jalǵasady.

Atap óterligi, byltyr «Qaz­AvtoJol» AQ-nyń óńirdegi fı­lıa­lynyń basshylyǵy oblys orta­lyǵynda jańa kópir qurylysy qolǵa alyna qalsa, bizdiń jobamyz daıyn dep málimdegen-tuǵyn. Anyqtap bilgenimizdeı, nysan sol jobanyń negizinde turǵyzylatyn bolyp shyqty.

– Jańa kópir eskisiniń dál ja­­nynan, aǵys­tyń tómengi ­tu­­sy­­nan salynatyn bolyp sheshim qa­byldandy. Kópirdiń uzyn­dyǵy 691 metrdi qurasa, oǵan qatysty barlyq joldyń uzyn­dyǵy 2,7 kılometrge jetedi. Normatıv bo­ıynsha jańa kópirdiń qurylysy 25 aıda salynýy kerek. Odan soń eski kópir buzylyp, bólshektelip alynady. Oǵan shamamen qosymsha 14 aı jumsalady dep otyrmyz. Sonda joba barlyǵy 39 aı ishinde eńserilýge tıis. «QazAvtoJol» AQ negizgi tapsyrys berýshi retin­de tańdaldy. Sondyqtan negizgi ja­ýap­kershilik te bizge túsip tur. Qarajat naqty bólingeni belgili bolsa, biz konkýrs jarııalaý ju­­mystaryn bastap ketemiz, – deıdi «QazAvtoJol» AQ oblystyq fılıaly dırektorynyń orynbasary Alekseı Logvınenko.

Qurylysy jaǵynan kópir Ame­rı­kanyń iri qalalarynda jıi salynatyn ekstradoz tıpindegi aspaly nysan retinde turǵyzylmaq. Qurylysty 4 úlken tirek ustap turady. Mundaı konstrýksııa ózi­niń beriktigin dáleldegen. Ári ja­salǵan joba da memlekettik saraptamadan sátti ótti.

Alekseı Aleksandrovıchtiń só­zi­ne qaraǵanda, kópir ornyn da­ıyndaý barysynda Ertis ózeniniń oń jaq jaǵalaýynda shamamen 3,5 myńdaı aǵash otalady. Onyń ornyna keıin 35 myńǵa jýyq jasyl jelek otyrǵyzý josparlanǵan. Eger qarajat ýaqtyly bólinip, qurylys jumystary kózdelgen merzimde bas­talyp ketse, jer­lesterimiz jańa kópir boıymen 2025 jyly júre bas­taýy ǵajap emes.

Aıtpaqshy, A.Logvınenko Pav­lodarda «Shyǵys aınalma joly» jobasy da daıyn turǵanyn aıtyp ótti. Tranzıttik kólikterdiń qalany shyǵys jaǵynan aınalyp, ózge baǵyttarǵa ótýine múmkindik jasaıtyn jol tarmaǵy shamamen 33 shaqyrymdy quraıdy. Alǵashqy quny 22 mlrd teńgeni quraǵan jobada aınalma joldar, jol boıy servısi, úlken júk kólikterine arnalǵan turaqtar, basqa da qajettilik tolyǵymen qarastyrylǵan. Shyǵys aınalma joly júzege assa, oblys ortalyǵy aınalasyndaǵy aınalma joldar sheńberi tolyq túzilmek. Joba ázirshe qarjylandyrýdy kútip tur.

PAVLODAR