Festıvalge qatysýǵa elordalyq joǵary oqý oryndarynyń ókilderi arasynan barlyǵy 14 komanda ótinim bergen.
Stýdentter 10 nomınasııa boıynsha baq synasty. Olar ózderiniń qabiletterin bı, vokal, poezııa, mýzyka, beıneleý jáne teatr ónerinde, sondaı-aq ıntellektýaldy vıktorınada kórsetti. Qatysýshylardyń ónerin óner jáne mádenıet qaıratkerleri, elimizdiń eńbek sińirgen ártisteri, kásibı horeograftar men vıdeograftar baǵalady.
Festıvaldiń saltanatty jabylýynda qala ákiminiń orynbasary Eset Baıken baıqaýdyń ereksheligi elordanyń barlyq joǵary oqý oryndarynyń qatysýynda ekenin atap ótti. Onyń aıtýynsha, búginde Astananyń ýnıversıtetteri men kolledjderinde 62 myńnan astam stýdent oqıdy, jyl saıyn ózge qalalardan keletin talapkerlerdiń artýy baıqalady.
«Búginde elordany eldiń ákimshilik-saıası ortalyǵy ǵana emes, kásipkerler men jastar qalasy dep te ataýǵa bolady. Negizgi sebep - jastardy qoldaıtyn memlekettik baǵdarlamalardy iske asyrý jáne oqý oryndarynyń bilim berý sapasy. Jalpy, bul festıval qazirgi ýaqytta shyǵarmashylyq áleýetti iske asyrý, jańa tanystar tabý jáne jastar arasynda mádenı ortany qalyptastyrý úshin tolyqqandy alańǵa aınaldy», dedi ákim orynbasary.
Baıqaý jeńimpazdarynyń biri Qazaq ulttyq óner ýnıversıtetiniń stýdenti Jantas Erkinuly boldy. Táýelsizdik taqyryby ony erekshe shabyttandyrypty. Jas aqyn óz óleńinde Otanǵa degen súıispenshilik týraly aıtyp, qazaqstandyqtardy patrıotızmge shaqyrdy.
Sondaı-aq, «Turan» ýnıversıtetiniń stýdenti Karına Mınıalo baıqaýǵa daıyndyǵy týraly estelikterimen bólisti.
«Biz «Ulttyq bı» nomınasııasyna qatysyp, sheshen halqynyń bıin daıyndadyq. Kópshiliktiń esinde qalatyn óner kórsetkimiz keldi. Meniń oıymsha, bul baıqaý talanttardy ashýǵa kómektesedi. Árıne ekinshi oryn alǵanymyzǵa qatty qýanyp otyrmyz, dedi «Iman» ansambliniń múshesi Karına Mınıaılo.
