Pavlodar oblystyq aýmaqtyq saılaý komıssııasynyń tóraǵasy Gúlnar Amanjolovanyń aıtýynsha, jalpy óńir boıynsha 542 saılaý komıssııasy qurylǵan. Onyń 14-i aýmaqtyq bolyp sanalady. О́zgesi – ýchaskelik komıssııalar. Munda barlyǵy 3502 adam jumys isteıdi. Daýys berý prosesine keler bolsaq, azamattar óz tańdaýlaryn 528 saılaý ýchaskesinde jasaı alady. Atap aıtqanda, 138 ýchaske oblys ortalyǵynda, 65 ýchaske Ekibastuz qalasynda, 40 ýchaskede Aqsýda jáne 285-i aýdandarda ornalasqan.
Saılaý kúni óńirdegi 225 saılaý ýchaskesinde daýys berýshiniń ótinishi boıynsha tirkeý ornyn tekserý servısi jumys isteıtin bolady. Al tirkeýi joq turǵyndarǵa keler bolsaq, olar úshin 6 saılaý ýchaskesinde qyzmet kórsetiledi. Atap aıtqanda, Pavlodar qalasyndaǵy № 11, 15, 51, 79, Ekibastuzdaǵy № 536 jáne Aqsý qalasyndaǵy № 485 saılaý ýchaskelerinde mobıldi halyqqa qyzmet kórsetý ortalyqtarynyń jumystary uıymdastyrylady. Iаǵnı, turaqty tirkeýi joq azamattar osy saılaý ýchaskelerinde bir kúndik tirkeýge turyp, daýys berý múmkindigin paıdalana alady. Al kelesi kúni tirkeýden avtomatty túrde shyǵarylady.
Búgin qoǵamdyq kólikter jolaýshylardy tegin tasymaldaıdy ári ınvataksı qyzmet kórsetedi. Densaýlyq jaǵdaıyna baılanysty ýchaskege kele almaıtyn azamattar saǵat 12.00-ge deıin saılaý ýchaskelerine habarlasyp, daýysty úıden berýge nıetti ekenin bildirýi kerek. Sol ótinish negizinde komıssııa músheleri turǵynnyń úıine barady.
