О́tken bes jylda gazǵa qol jetkize alatyn taldyqorǵandyqtardyń tek jartysy ǵana kógildir otynǵa qosylǵan. Bul – 30 myń abonent, ıakı turǵyndardyń 55 paıyzy ǵana. Qala turǵyndarymen kezdesýde oblys basshysy Beıbit Isabaev bul istiń baıaý júrýine gazǵa qosý qunynyń joǵary bolýy sebep bolyp otyrǵanyn jetkizdi. Búginde qazandyq pen jıyntyqtar qunyna baılanysty gaz qostyrý 700 myń teńgege deıin barady. Muny estigen halyq ábigerge túsýde.
«Zalda merdiger kompanııalardan kelgen ókilder bar ma? Qazandyqty esepke almaǵanda gazǵa qosylý quny nege qymbat, sony túsindirip berińizdershi?» dep surady B.Isabaev. Oǵan zalda otyrǵan «Dat Kontınental» JShS ókili Almas Smaǵulov jıyntyqtardyń, sonyń ishinde qubyr baǵasynyń ósýine baılanysty ekenin jetkizdi.
«Al biz problemaǵa basqa qyrynan qaraımyz. Árıne, qazandyqtyń, jıyntyqtardyń baǵasy óskenin túsinemiz. Biraq gazǵa qosý jumystarynyń baǵasyn qoldan ósirýge bolmaıdy. Smetalyq esepterge sáıkes ol qazandyq pen jıyntyqtardy qospaǵanda 170 myń teńgeden aspaýy kerek. Turǵyndarǵa ádiletti baǵa usynylýy kerek. Olaı bolmaǵan jaǵdaıda qalany gazdandyrý jumysy «Jetisý Gaz Servıs» MKK-ǵa beriletin bolady. Oǵan qosa «QazTransGazAımaq» AQ halyqqa kórsetetin qyzmet mehanızmderi men merzimderin jedel túrde qaıta qaraýǵa tıis. О́ıtkeni kompanııa tarapynan isti sozbaqqa salǵan jaǵdaılar az emes. Ruqsat alý prosedýrasy 3-4 aıǵa sozylyp ketedi, mundaıǵa jol berýge bolmaıdy», dedi B.Isabaev.
Osy rette qala ákimi Áset Masabaev pen Básekelestikti qorǵaý men damytý departamentine tıisti tapsyrmalar berdi. Sondaı-aq qala ákimine «QazTransGazAımaq» AQ-men birlesip, qoldanystaǵy gaz qubyrlarynyń tehnıkalyq jaǵdaıyn tekserý men dıagnostıkalaý jumystaryn jyldam aıaqtaýdy mindettedi. Qazir gazdyń mólsherden az bolýy jıi baıqalady. Turǵyndar qaqaǵan qysta úıden jylý qasha ma dep alańdaıdy. Eger qurylys jumystarynyń sapasyz atqarylý faktisi rastalǵan jaǵdaıda merdiger kompanııalarǵa talap qoıylmaq. Bul tizimde «MVK-Qurylys», «Aqnıet-BN», «TýrGaz» JShS-lary bar.
Jetisý oblysy ákiminiń baspasóz qyzmetiniń málimetine súıensek, qarasha aıynyń sońyna deıin «Úıtas» saıajaıyna, «Ekspedısııa» jáne «IJS 3-bólimshe» turǵyn úı alaptaryna kópten kútken kógildir otyn beriledi. Sondaı-aq keler jyly «Jastar-2» turǵyn úı alaby men (295 mln teńgege) Yntymaq eldi mekeninde (1,4 mlrd teńgege) júrgizilip jatqan gaz qubyrynyń qurylysy aıaqtalady. Sol sııaqty 2023 jyldyń II toqsanynda qalany gazdandyrýdyń negizgi jobasyna kirmegen ýchaskelerde gaz taratý jelisiniń qurylysy bastalady. Atap aıtqanda, bul jumystar 6, 7-shaǵyn aýdandarda, «Plodopıtomnık», «Agropromyshlennık», «Jastar-1/1» turǵyn úı alaptarynda, Moınaq aýylynda atqarylady.
«Meniń tapsyrmammen qalǵan 8 eldi mekenge, naqtyraq aıtqanda «Almaly», «Ashybulaq», «Merekelik», «Sarybulaq», «Qyzyl tas», «Balyqty», «Qaratal» saıajaılaryna jáne «IJS 1-bólimshe» turǵyn úı alabyndaǵy qurylys jumystaryna qatysty jobalyq-smetalyq qujattarǵa qajetti esepteýler jasalyp jatyr. Sóıtip, 2025 jyly qalanyń eldi mekenderiniń barlyǵy gazdandyrylady», dedi B.Isabaev.
Jalpy, oblys ortalyǵyna gaz 2017 jyly jetkizilgen. Qazirgi kezde qalany gazdandyrý jumystary negizinen aıaqtaldy. Kógildir otynǵa turǵyndardyń 90 paıyzynyń qosylýyna múmkindik jasalǵan.
Jetisý oblysy
