Máselen, qolǵa alynǵan turǵyn úı saıasaty arqyly 7 myńnan astam azamat satyp alý quqyǵynsyz jalǵa beriletin baspanamen qamtylady. Sonymen qatar «Otbasy» banki arqyly óńirlerde kezekte turǵandarǵa arnalyp 9,8 myń kredıttik turǵyn úı salynyp jatyr.
Budan basqa kezekte turǵan 6,1 myń adamǵa 2%-dyq mólsherleme boıynsha, sondaı-aq kezegin kútip otyrǵan taǵy 7,8 myń azamatqa 5%-dyq mólsherlememen zaıymdyq qarajatty usyný arqyly memlekettik qoldaýdy kórsetip, jekemenshik turǵyn úı qorynda jalǵa beriletin páterdiń turǵyn úı tólemderin óteý kózdelgen.
Vıse-mınıstrdiń aıtýynsha, qabyldanyp jatqan sharalar men azamattardyń baspana alý máseleleri sheshilip jatqanyna qaramastan turǵyn úıge muqtaj jandardyń qatary ulǵaıyp keledi.
Qazir ákimdikterde kezekte turǵandardyń kórsetkishi 623 myń adamǵa jetip, onyń ishinde 400 myńnan astamy áleýmettik osal topqa kiretin azamat sanalady.
Jyl saıyn kezektilik orta eseppen 50 myń adamǵa ulǵaıyp keledi. Kezektiliktiń artýy bıýdjetke aıtarlyqtaı salmaq túsirip, áleýmettik turǵyn úı salý men osy baǵytta jeńildetilgen nesıeleýdi arttyrý úshin qomaqty ınvestısııalardy talap etip otyr. Osyǵan baılanysty mınıstrlik turǵyn úı saıasatyn reformalaý máseleleri jónindegi zań jobasyn ázirlep, qazir ol Parlament Májilisinde qaralyp jatyr.
Atalǵan reformanyń aıasynda esepke alý jáne kezekke qoıý jónindegi tásilderdi ózgertip, sondaı-aq tabystyń kólemine baılanysty memlekettik qoldaý sharalaryn iske asyrý kózdelgen.
Tyń tetik jergilikti atqarýshy organdarda kezekte turǵandarǵa qatysty málimetti «Otbasy» bankine berýdi qarastyrady. Osy arqyly ákimdikterde esepke qoıý tártibi toqtatylady. Jańadan qurylǵan Turǵyn úımen qamtamasyz etý ortalyǵynyń bazasyna qandaı da bir sanatqa qaramastan keıingi 10 jylda baspanaǵa muqtaj barlyq azamat esepke alynady.
Osy baǵytta quzyrly organ otbasylardyń sıfrly kartalaryn jáne Smart Data Ukimet aqparattyq júıelerin paıdalanyp, kezekte turǵandardyń tabysyn, nesıelerin jáne jyljymaıtyn múlikke taldaý júrgizý boıynsha Eńbek jáne halyqty áleýmettik qorǵaý, sonymen birge Sıfrlyq damý, ınnovasııalar jáne aeroǵarysh ónerkásibi mınıstrlikterimen tıisti jumysty bekitip, qolǵa aldy.
Turǵyn úı saıasatyn damytýdaǵy taǵy bir mańyzdy baǵyt – aýyldy jerlerdegi baspana qurylysyn yntalandyrý tetigi sanalady. Salynǵan turǵyn úı paıdalanýǵa berilgen soń jumys berýshilerdiń shyǵyndaryn baspana alańynyń 50% kólemine baılanysty sýbsıdııalaý kózdelip otyr.
Jyljymaıtyn múlik 5 jyldyq eńbek sharty bar qyzmetkerlerge beriledi.
Tyń derekterge súıensek, óńirlerde barlyǵy 2 855 (76 aýdanda) turǵyn úı qurylysyn bastaý mejelengen. Ataýly kómek túrinde jeke turǵyn úı qorynan baspanany jalǵa alýǵa toqtalsaq, mınıstrlik osy qoldaýǵa úmitti azamattar úshin baǵdarlamadaǵy turǵyn úı tólemderin taǵaıyndaýdy 17-den 12-ge deıin azaıtyp, ońtaılandyrdy. Buǵan qosa Elektrondy sıfrly qoltańbany qoıý kezinde ótinish berýshiniń derbes derekterin tekserip, óńdeýge jáne tólemderdi alýǵa kelisim berýdiń biryńǵaı rásimi bekitiledi.
Budan bólek ótinish berýshiniń tabysynan zeınetaqy men áleýmettik tólemderdi esepteý alynyp tastalady.
Otyrys sońynda vıse-mınıstr qabyldanyp jatqan sharalar halyqtyń basym bóliginiń baspana alý máselesin sheship, jumys oryndaryn saqtaı otyra ekonomıka men kásipkerlikti damytýǵa oń áserin tıgizetinin jetkizdi.
