Qazaqstan • 26 Qarasha, 2022

Aldaǵy saılaý depýtattyq korpýstyń ózgerýine múmkindik beredi - M.Áshimbaev

52 ret kórsetildi

Senat Tóraǵasy Máýlen Áshimbaev Facebook paraqshasynda Qazaqstan Respýblıkasy Prezıdentiniń saltanatty ulyqtaý rásimi týraly jazdy, dep habarlaıdy Egemen.kz.

«Búgin Qazaqstan Respýblıkasynyń Prezıdenti Qasym-Jomart Kemeluly Toqaevty saltanatty ulyqtaý rásimi ótti. Osylaısha Memleket basshysy óziniń jeti jyldyq qyzmetine resmı túrde kiristi. Bul elimizdiń saıası ómirindegi aıtýly oqıǵa ekeni sózsiz.

О́tken saılaýda azamattarymyz Qasym-Jomart Kemelulyna zor senim bildirip, ádilettilikke taban tireıtin memleket, ekonomıka jáne qoǵam qurý baǵdarlamasyn qyzý qoldaǵany belgili. Prezıdentimiz ultymyzdyń osy úmitin aqtaý óziniń aldaǵy basty mindeti bolatynyn jarııalady. Sonymen qatar saılaý aldynda berilgen ýádelerdi iske asyrýǵa jol ashatyn bastapqy ári naqty jumys baǵdarlaryn aıqyndap kórsetti», dep jazdy M.Áshimbaev.

Sondaı-aq ol jazbasynda Prezıdenttiń zań aldynda báriniń teń ekenin aıtqan sózine nazar aýdarǵan.

«Elden zańsyz shyǵarylǵan barlyq aktıvti elge qaıtarý mańyzdy mindetke aınalýda. Bul úshin zańsyz shetel asqan kapıtaldy qaıtarýǵa qajetti rásimderdi retteıtin zań jobasy ázirlenetinin jetkizdi. Sondaı-aq Prezıdentimiz óńirlerdi, onyń ishinde aýyldarymyzdy órkendetýge aıryqsha kóńil bólip otyr. Osyǵan baılanysty Qasym-Jomart Kemelulynyń jańa prezıdenttik merzimdegi birinshi Jarlyǵy aýyldy damytý máselesin sheshýge arnaldy. Sonymen birge aýqymdy ındýstrııalandyrý, ınfraqurylymdardy salý jáne jańǵyrtý isi de tyń serpinmen qolǵa alynady», delingen jazbada.

Budan soń, ol Konstıtýsııaǵa sáıkes bılik tarmaqtary túgel jańǵyrtylatynyn jazǵan. Aldaǵy jyldyń 14 qańtarynda Senat depýtattarynyń saılaýy ótedi.

«Bul bizdiń depýtattyq korpýstyń sapalyq turǵydan ózgerip, óz jumysyn jańa mindetter aıasynda laıyqty jalǵastyrýyna múmkindik beredi. Ádiletti Qazaqstandy qurý – barshamyzdyń ortaq maqsatymyz. Osy jáne alda jarııalanatyn basqa da bastamalar men mindetterdi zańnamalyq turǵydan sapaly ári ýaqtyly qamtamasyz etý Senattyń aldyndaǵy basty mindeti bolyp qala beredi», dep jazdy Senat Tóraǵasy.

Sońǵy jańalyqtar

Prezıdent qolónershiler kórmesin aralady

Prezıdent • Búgin, 21:01

Uqsas jańalyqtar