Kóńilge úmit syılaǵan Jarlyq

Prezıdent aýyldaǵy jaǵdaıdy jaqsarta almasaq, bárimizge úlken syn bolatynyn qadap aıtyp, eń aldymen aýyldy damytý máselesi týraly Jar­lyqqa qol qoıdy jáne Úkimetke aýyl­dy damytýdyń 2023-2027 jyldarǵa ar­nal­ǵan naqty josparyn ázirleýdi tapsyrdy.

Aýyldy kórkeıtý maqsatynda buǵan deıin de kóp baǵdarlama bolǵanyn kóp­shilik kórip-bilip otyr. Biraq nátıjesi mardymsyz. Osy oraıda, Prezıdenttiń aldymen aýyldyń áleýetin kóterýdi eń birinshi másele etip kóterýi kóńilge úlken úmit uıalatty.

Biz – Qostanaı oblysynyń dıqanda­ry Prezıdentti tolyq qoldaımyz. О́ıt­keni aýyl sharýashylyǵy aýylsyz ilge­ril­meıdi. Memleket basshysy bizdi alań­datqan máselerdi dóp basyp aıtty.

Qazaqtyń rýhy, salt-dástúri, kásibi men nesibesi, áli de bolsa, aýylda ja­tyr. Sondyqtan Memleket basshysy du­rys másele kóterip otyr. Eń birinshi másele, aýyldy jaqsartý úshin – aýylda turatyn halyq bolý kerek. Al halyqty aýyl­ǵa aparý úshin eldi mekenderdiń ınfra­qurylymyn durystaý qajet. Sý, jol máselesi birte-birte sheshiler, biraq eń bastysy, aýylǵa gaz tartý kerek. Gazsyz aýyl damymaıdy. Talaı aýyl­dy kórdik, sýy bar, joly bar. Sonda da, kógildir otyny joq bolǵan soń, halqy qalaǵa qaraı tartyp turady.

Taǵy bir úlken másele, aýyldan shy­ǵatyn aýylsharýashylyq ónimderi aýylda óńdelýi kerek. О́ńdeý óner­kásibi damyǵan aýylǵa adam da barady, mal da bitedi, jumys ta bolady.

Prezıdent búginde halyqtyń 40 paıyzy aýylda turatynyn atap ótti, bul az emes. Qalaı aıtsaq ta, mal ustap, egin egý – bizdiń qanymyzda bar, súıeksińdi ata kásibimiz. Búgin bárimiz qalaǵa kóship ketsek, erteń mynaý úlken-úlken alqaptarǵa kim ıe bolmaq? Ásirese, shekara túbindegi aýyldardy damytý mańyzdy. Bul aýyldarda halyq kóp bolýy kerek.

Toq eterin aıtqanda, meni Qasym-Jomart Kemelulynyń bul jolǵy saılaý nátıjesin ózine júktelgen úlken jaýapkershilik retinde qabyldaǵany jáne máseleniń basyn aýyldan bastaǵany qýantady.

Saıran BUQANOV,

Qazaqstannyń Eńbek Eri

Qostanaı oblysy,

Meńdiqara aýdany,

Harkov aýyly