Jıynǵa «Atameken» Ulttyq palatasy basqarma tóraǵasynyń orynbasary Málik Sáýlebaı, «Atameken» Ulttyq palatasynyń qurylymdyq bólimsheleri men óńirlik kásipkerler palatalarynyń basshylyǵy, sondaı-aq Agenttiktiń aýmaqtyq departamentteriniń basshylary qatysty.
Otyrys barysynda kásipkerlerdiń ózekti jáne problemalyq ótinishteri qaralyp, top jumysynyń aldyn ala qorytyndylary shyǵarylyp, aldaǵy kezeńge arnalǵan josparlar men mindetter aıqyndaldy.
«Aýmaqtyq departamentterdiń qylmystyq isteri boıynsha bıznestiń qatysýymen tergeý áreketteri edáýir qysqartyldy, bul Agenttik engizgen vedomstvolyq baqylaý tetiginiń nátıjesi. Bıznespen myńnan astam tergeý áreketterin júrgizýge jol berilmedi, bul kásipkerlerdi tergeý kabınetterine barýǵa, is júrgizý is-sharalaryna qatysýǵa artyq ýaqyt jumsaýdyń aldyn alady. Sonymen qatar, sybaılas jemqorlyqqa qarsy qyzmet memlekettik qyzmetshiler tarapynan zańsyz aralasý jáne bızneske qysym jasaý faktilerin anyqtaý boıynsha júıeli jumys júrgizýde», delingen agenttiktiń habarlamasynda.
Habarlanǵandaı, jyl basynan beri osyǵan uqsas 72 fakt anyqtaldy, olar boıynsha 165 sotqa deıingi tergeý bastaldy. Nátıjesinde 112 laýazymdy tulǵa áshkerelenip, onyń 65-i sottaldy.
Zańsyz áreketterdiń kópshiligi para alýmen baılanysty, sonyń ishinde oryndalǵan jumystardyń aktilerine qol qoıý, ruqsat qujattaryn berý jáne basqalary jatady. Olardyń jalpy qurylymdaǵy úles salmaǵy 80%-dy qurady.
Sondaı-aq otyrys barysynda 2022-2026 jyldarǵa arnalǵan sybaılas jemqorlyqqa qarsy saıasat Tujyrymdamasyn iske asyrý jónindegi is-sharalar josparyn oryndaý boıynsha naqty usynystar ázirlendi.
